Sos Campanones de Santa Maria
àn ispartu su mìsticu limbazu
nan sos malinnos ch'est bogh' 'e sonazu
sende ch'est zusta e bella s'armunia.

Ite cherides?... Su popolu est gai...
càmpanas non connoschet bene fattas'
nan chi sun tappuladas e annattas,
ma sìmiles non nd'amus tentu mai.
Si burdellaban sas berzas assai,
custas a donzi cosa sun adattas.
Si ziras mesu mundu no accattas
sìmile portentosa galania.

Sos campanones de Santa Maria...

Cando isparghen sa boghe su manzanu,
su sonnu non ti solen disturbare,
ti lassan in su lettu reposare,
mancari istes sett'annos fittianu...
ca pessas chi sunu sonos de tianu
faghes a mancu de tinde pesare.
Càmpanas bellas dignas d'ammirare
chi faghen solas sa precadoria.

Sos campanones de Santa Maria...

Issurdaban su locu sas anticas,
printzipalmente sa càmpana manna.
Si nde pesaban tètteras che canna
de sa corona tottu sas amicas.
Si nch'intendian fin' a Sas Cradicas,
custas appen'appena a Badde Manna
troppu zusta est istada sa cundanna:
secare a marza sa chi fit cannia.

Sos campanones de Santa Maria...

Si bivat a chent'annos Mussennore,
ca l'àt discurta chin fine talentu!
A battire sor mastros a intentu
de su brunzu a connoscher su valore,
ch'ìscana cantos grados de calore
tenner depiat su ruju elementu,
pro iscallare sas perzas de chentu
aneddos e buttones chi b'aiat.

Sos campanones de Santa Maria....

Prontas sas formas e prontu su metallu,
si ponen custos mastros in faina.
Invocan de su Chelu sa Reina
chi lo assestat in cussu traballu!
Tottu cantu resessit sentza irballu
pro chi connoschen s'arte supraffina.
Ecco, nch'essit Maria Carmellina
de su pìscamu nostru vida e ghia'

Sos campanones de Santa Maria...

In fattu e cussa nch'essin tottu cantas
e las impiccan pro sa maravilla:
curret sa zente alligra e ispipilla
pro bier sa Maria chin sas Santas
e tziu Longu bidèndende tantas,
narat: «Però sa menzus billa, billa!
Annottatila... non de juchet tilla
ca su furru l'àn fattu in domo mia».

Sos campanones de Santa Maria....

Provadas e istesas in su carru
nche las collocan chin bona manera
chin duos jubos tottu galavera
che las antzian a sonu 'e tambarru.
Tzocca sas manos cumpare bambarru
e narat: «chi mi ghetten a galera
si tres cantares no est prus lizera
de sa ch'àtteras bortas bi drinnia!»

Sos campanones de Santa Maria...

Abellu abellu, a passu regulau
ecco nche crómpene a su piatzale.
Inibe nche las falan sentza male
pro chi totu fit bene carculau
de pustis chi fit tottu preparau,
essit Demartis in pontificale
e armadu de mitra e pastorale
las battizat chin pompa e allegria

Sos campanones de Santa Maria...

Pustis iscontzan s'iscala e sa turre
pro che las antzïare in tallïora,
ca non cumbenit dae s'ala ‘e fora:
s'inzenïeri Mura bi discurret.
Istat tottu sa zente curre curre
de las toccare non biene s'ora
precan a Deus e a Nostra Sennora
chi nche resessan in sa balentia.

Sos campanones de Santa Maria…

Eccolas finalmente tottu a postu
prontas a su repiccu disizau!
Cada limbeddu est bene collocau
de coriu crudu che attariu tostu...
las cheren repiccare a donzi costu...
però issas, appena comintzau,
de s'oro chi su focu àt consumau
toccan, a surdas lassas, s'agonia.

Sos campanones de Santa Maria…

A s'intender su toccu lamentosu,
surdu comente in puttu unu puale,
totus comintzan a nde parrer male,
Mussennore diventata furiosu,
Don Dïegu non tenet prus reposu:
zurat chi sonat menzus s'urinale,
pride Verachi chin pride Pascale
trochen de conca e naran ch'est lapia.

Sos campanonos de Santa Maria....

A sa fine decretan chi collana
non nde depian zucher sos limbeddos,
ca, essende presos che catteddos,
no lis fachiat de drinnire gana.
Che lïas catzan a donzi campana
e las torran a grantzos e aneddos.
Comente mastru de bonos cherbeddos
mastru Zizi l'àt fatta s'attrivia.

Sos campanones de Santa Maria…

Torran a repiccare chin assentu
credéndelu s'errore reparau,
ma comintzande dae su bichinau
su popolu nde restat discuntentu!
A cad'ora fachende sun chimentu.
E est ca non l'àn bene carculau:
galu su brunzu no est iffrittau,
lassae a cando fachet sa finia.

Sos campanones de Santa Maria…

Cando l'essit su sonu armunïosu,
tand'alligrare ti podes Nugoro!
Chi no às postu de badas tant'oro
nde des podes andare orgollïosu
supra totu sos populos famosu
ca de ramen lu tenes su tesoro.
Non ti lu ponzas goi tantu a coro
fintzas a bier cussa resissia.

Sos campanones de Santa Maria…

In ùrtimu des tenner su cossolu
de ti lu bier s'onore torrau
cando de custos toccos istraccau,
nde des fàchere balente lapiolu
in campanile chin d'unu mojolu
podes suprire su chi nd'às piccau
e, de tant'oro in focu consumau,
toccare, a surdas lassas, s'agonia.

Sos campanones de Santa Maria…