Sas raccumandas de tziu Giustinu
di Gaspare Mele

Deus, pro pensare una mente
nos at dadu, pro amare unu coro.
Nos at dotadu de virtude e decoro
pro cunfortare sa misera zente.
Custos cuncettos tenemos presente:
amare su prossimu est tesoro.
T’illuminat sa vida chi preferis
si su coro a sos poveros aberis.

No t’incantet sa richesa terrena
o delitzias de sa vida mundana.
Rispetta che tua sa cosa anzena,
osserva sa dottrina cristiana.
Cunsola sos chi viven in pena,
oppressos dae s’ingordigia umana.
Cando daes pane a su famidu
Deus est de te aggradessidu!

Inue b’at dirgrassia o malasorte,
daelis unu azudu, una manu.
Inue repentina intrat sa morte,
juchelis su cunfortu cristianu.
Inue bi at briga e odiu forte
pacifica cun amore soveranu.
Inue b’at rancore e disamistade
juchelis de Deu sa serenidade.