SCARESCIAS

A sa memoria de is undixi femminas e pipìas
spacciadas in d-unu cantieri de sa miniera
De Montevecchio su 4 de Maju de su 1871.

Scarescias.
Spedrias e scarescias
Femminas
femminas tristas
famìas e stratalladas.
Antiòga, Arròsa, Luigina
Anna, Caterina:
pipias
giai femminas po s’amarolla
furadas a is bisus e ais giogus
pipìas chi no heus connotu
s’amparu de una domu
digna ‘e cristianu
ne is bancus nieddus
spistoraus de scola,
ne mai incingiàu
unu bistireddu bonu.
Femminas
mammas de su dolori
heus trisinau sa vida
in s’inferru de Atzuni
a trassa de presoneras
po unu bucconi
murrungiau de pani.
Femminas affrigìas
chi heus fruciu s’abettu
po su cras de is fillus nostrus
in sa tristura de is barraccas
po s’allupài spacciadas
in s’ora de sa barrilloca.
Immoi,
senz’ ‘e prus bisùra
spedrias e scarescias
de custu tempus
sciapidu e milindrosu.
Scarescias.
Manc’una gruxi
innui s’arrimài unu frori.

Guglielmo Piras-Sinnai