Semenamos Paghe
di Gian Piero Agotzi

A logos de tristura e de piantu
sena accunnortu e sena consolu
bolat sa mente, isparghet su ‘olu,
tottue s’intendet su funebre cantu.

In terra traitora e ingrata
zovanos de coro e de valore
comente tando semper han onore
bivet eterna sa Sarda brigata.

Ma gherras preventivas si resonas,
non sun bellas, nemmanco cuddas santas,
ca sas gherras sun gherras totucantas,
sun malas, sun castigu, no sun bonas.

Sa paghe cun sa paghe semenamos
ca sa gherra no morit cun sa gherra,
s’est fogu alluttu in totu sa terra
cun amore e perdonu l’ istudamos.

A terra interessu e bramusias
de nassiones mannas e potentes,
cun rispettu e s’istima de sas zentes
vivat su mundu bramau d’Isaias.

Sena armas ne venenos fatales
solu laores e frutturas bundantes,
cun azudos e amparos costantes
bivan sos omines annos immortales.

Iscanu, 22-11-2003