Serenada a una rosa
de Giovanni Fiori

Eàllu, millu mì’ ‘enzende a maju
frunidu a nou a sa fatta ‘e sa die
e deo inoghe so ‘izende a tie
rosa ancora serrada in su tenaju!

Isparghe sas fozas tuas
a su ‘asu ‘e su ‘eranu;
abberi che una manu
sas dulches ganas chi cuas
in sas laras tottas duas
caldas, sìncheras che ou.
Tue ses lentore nou
subra s’erva fiorida
e falas mudende vida
a sa terra in sinu sou.

Fadados mizas de mundos
in sas pupias inserras;
accordas chentu chiterras
cun sos pilos tuos brundos.
Sos bellos càvanos tundos
T’inghìriana sos chizos;
sas ojadas sunu lizos
chi s’abberini che prendas;
funtana frisca ‘e siendas,
riu ‘e dèchidos disizos

Sonazadu su masone
paschet ispartu in sa tanca
e-i sa luna bianca
faghet in chelu balcone. 1
Da-e sos montes s’ ‘Udrone 2
s’est appenas acceradu.
Su massaju hat appazadu
sos boes in su ‘acchile:
torrat sa vida, a puddile,
lughet s’abba intro su adu.

Noa sa lughe a mannujos
s’altzat pàsida e lizera
isparghendesi in s’aera
cun largos chintales rujos.
Fuma-fuma sos restujos
s’ ‘iden intro s’ ‘adde attesu...
Rosa, si non m’has intesu
drommi, non t’ischides, pasa!
Ma isco ch’intesu m’hasa,
chi m’amas, chi m’has cumpresu.

Eallu, millu mì’, ‘ennidu est maju
frunidu a nou a sa fata ‘e sa die
e deo inoghe so mirende a tie
rosa ispamparriada in su tenaju.

3° Premio, Cenacolo di Ozieri 1977