Ses culumba
de Salvatore Ladu

Prite cheres volare
Supra montes e mare
Cun alas de astore. Ses Culumba
Torradinde a nidu
Non cambies partidu
A ue crios pranghen che piumba
Su coro lis as fertu
Amore pedini a pittul’apertu.

Bestidos de anneu
Disizzande recreu
Sutta chel’isteddadu. Iscura nue
L’est copertura como.
Sa ziminera in domo
Non caentat che cando bi vis tue.
Durche mama e isposa
Totus cumbenin vid’atera cosa.

De viscios ti cuntentas
Mira non tinde pentas
Cando su samben zessat de buddire
E che foza t’allizas
Tando forzis t’abbizas
Chi su menzus ti mancat e, gudire
Non podes de su fruttu
In abbandonu chi, latte t’at sutu.

Collanas e aneddos
T’annuan sos cherveddos,
Su pane in mesa no est suoradu,
Nuscos chi imbriagan
A sa fine ti pagan
Cun sas intradas a pesu at farzadu
E t’azzapas in manos
Unu punzu ‘e paza senza granos

A cocorosta ‘e puddu
Zente senza miduddu
Bellos a foras, a intro marzios
Chi non connoschen buscos
Cun sapores e nuscos,
In sardu li naramus, sos avios
Cun s’unica pretesa
Chi su bene prus mannu est sa ricchesa.

Sa carre ch’ana a mossu
Cand’est torrada a s’ossu
Frundini a cane e, non proan dolore.
Asulu mancu appenas
As sambene in sas venas,
Su tuo est durche, ruiu de colore.
Ti faghen sa viacca
E non t’abizzas chi, t’ana a teracca.