*Si si bortan, sos pecos...
di Michele Podda

Deus meus Sennore
non ti lasses trampare
puru pecos bi nd'at malos e bonos;
pius d'unu traitore
e pro los perdonare
nan chi sa mente insoro no at donos;
si lis intras in manos
ochin a Tie cun sos cristianos.

No est solu leone
o tzerpe benenosa
chi m'atèterat o faghet a cantos,
est un'ocasione
chi mi paran sa losa
puru sos pecos chi creia santos:
pudda e porcu mannale
mudos mudos mi cheren mortu male.

Deo l'apo cumpresa,
issos faghen dirbetu
ca pedin sos deritos rispetados;
non nde cheren s'intesa
de istare in apretu
papande solu mangimes tratados;
si chèrene paschende
iscapos orroncrande e pitulende.

Canes cun chinococo
limba mala d' erbeghe
nos faghian colare in abbas malas;
mancu oe non nde toco
de su meduddu neghe
peta bùvula, est sa morte in palas;
puddas porcos e baca
cuddos arrefriados, custa maca.

Pone a timer sos pecos
finan de si bortare
lassen custos dirbetos a una banda;
si si etan a tzecos
non cherende ascurtare,
cando los matzellamus Tue cumanda:
s'ànima a moler fogu
pressutos e sartitza in custu logu.

* (In brulla, pro su respetu de dònnia bèstia de calesisiat arratza, pro su papare sanu, pro chi in Sardinna si mantenzat su modu antigu naturale, semper connotu tra pastores e massajos, addatàndelu a su tempus de oe).

2° Premio - Cuncambias 2010 - San Sperate