Che son belle e trint’annos
chi t’happo vhissitadu,
tue locu zentile po s’istranzu.
No happo vhidu ingannos,
che fizzu m’has trattadu
e galu oje prus de unu cumpanzu.
E addura e podera,
tue terra vhiera,
de t’aere in su coro ite vhalanzu.
Ca ipo zovhaneddhu,
ma trattadu mi has che fizzicheddhu.

B’it s’urru ‘e sa crachina,
piatza Carraghentu
e cuddhu vhichinadu, Serr’iscoppas.
Ses digna raichina,
chi mudas cuss’ammentu,
sos silanessos galu chi intoppas,
m’ammento a coro in manu,
de tziu Domianu,
ateras cumpanzias ite troppas.
Contavhat de sa gherra,
de su monte, sa marghine e sa serra.

Esciapo su sero
po carchi passizada,
s’aghera tua it unu cossolu.
Oje galu b’ispero,
si potho un’iscappada,
a bissitare, ne vhennere a bolu.
S’Eremu o ferrovia,
babbu ‘e poessìa,
ma su destinu non mi lassat solu.
Ca non so prus selenu,
accumpanzadu so che-a Murenu.

De coro e chin istima,
ti saludo Silanos,
pothas godire de serenidade.
E oje prus de prima,
bos astringo sas manos,
semper sintzeru e tottu in amistade.
M’arreas in su coro,
cale bellu tessoro,
umile terra ricca onestade.
Mancari po agustu,
Santu Laretnu bos promitto custu.

Settida ses in pedes de su monte,
su coro meu ti juchet de-vronte.

Nu/5/02/15