Sinnales de beranu
de Mario Nurchis

No incadenes pius su coro
a frittos abidos de babbucceri.
No isprofundes torra
in su cadreone sonnigosu
in mesu a ischigliantes colores frazelladores
cun sa pubblicidade pressosa.

Sinnales de paghe frisca de amore
at mandadu s’alvure ‘e mendula
già biancu
a sa mimosa brunda
chi s’accerat curiosa
a s’istrada,
e-i su lentore umattu
infundet
de buttieddos tebios
s’asfartu murinu.
S’ortija imbirdit
in sas cresuras e in sos muros,
sa merula assamudada
iscrabiolat
in mesu ‘e mattas de crabufigu.
Sa dea ‘e sos colores
pinzellat intumbi-intumbi
e boltulat agghejosa
subra ‘e su murru
astragadu e annuzadu
de s’ierru
betzu
e ingalenadu.