Sisaja
mama-deina
de cussorjas e littos,
brùnzina mere
de nuraches e tumbas:

Tue ischis
su drillar' 'e so astros
sas abbas-sor bentos;
e ses tue
chi connosches
sas erbas beneittas
sor granos-sor frores.

De su occhile
son tuas
sas predas sacradas
e sa craes segretas
son tuas
de su limenarju.

Chin affumentos e pungas
crujas
anim'e corpus
e ligas
chin'atturas e berbos
gurpìas e feras.

Dae sas tumbas anticas
sor mortos bisajos
ne pesas
pro ischire
s'arcanu benturu.

Sa filonzana
ses tue
chi ordis e filas
su ilu 'e sa bida;

E s'aggabbadora
ses tue
chi truncas
piedosa
s'urtim'ispiru
a sos ustinados mortales.

4° Premio ex aequo 60° Premio Ozieri 2019 Sezione Poesìa sarda A. Sanna