So riccu
di Franceschino Satta

"Cuss’est poveru in terra!",
nat sa zente pro mene.
S’ irballat: eccomente!
Dego so riccu. Riccu! So poeta!
Inintro ’e coro juco
prus de milli aschisorjos
de marengos d’amore.
Cumprendo su limbazu ’e sos puzones,
sos nuscos delicaos
de sos bellos calabriches
ch’in beranu accasazan sa natura.
Sa frina, chi si basat
labores e funtanas , m’est amica.
Issa mi nat de cando
sas birghines galanas
ricamaban cantones
chin tramas d’arcu ’e chelu.
Mi nat de cando, galu creatura,
sa luna ingannadora,
m’affranzabat su coro ’e bonidade.
Mi faveddabat de gherras e de paches,
de juramentos fattos
e de tantas promissas non mantesas.
A s’iscusiu, sas tuppas de mudrecu,
mi cuffidan segretos
e minettas de focu.
Dego so riccu abberu. So poeta!
Comprendo sos misterios
de custu mundu arcanu
chi nos allatat s’anima,
tra sonnios e chimeras
e bolos d’immortale fantasia.
E canto chin amore
sa fide chi mi brotat
intro ’e benas de coro,
ei sos affettos beros d’una mama
chi si nìnniat su fizu
marmuttandeli isperas
e durches alapinnas de cossolu.
Ite bos paret? Naze: non so riccu?