Solu sas piedosas istajones
di Larentu Pusceddu

(A sos massajos de Oroteddi)

Ades caminadu in baddes chena fine,
sedes picados a montes chena punta,
sedes ruttos in mares chena fundu,
chircande su cras.

Mai ades bidu s'orizonte,
sa sicuresa, sa vida chena nues,
solu s'isperantzia fit cun bois
cumpanza in su caminu e in sa fadica.

Anneos a sa naschida,
ca de de sas mamas sos sinos
fin siccos che trainos in s'Istiu.
Su prantu unicu ammentu,
semper presente, unica veridade,
prus forte de su risu.
S'allegria, paraula misconnota,
fit in sas domos de pane biancu
pro cunfortare su bene naschidu.

Solu sas piedosas istajones
bos an dadu alimentu
cun sa durche murisca in sos Atunzos
cun sa pira aoschijola in sos Ierros,
cun sos erbuzos de sa primavera,
cun su nieddu orzattu in sos Istios.

E oe, che a deris, frades mios,
sichimus a chircare
su chi no an acatadu.
s'unica isperantzia
est ch'issa mai nos abbandonet.

(Premiu ispetziale de sa zuria - "S. Cambosu" Oroteddi 1980)