Solu tando germogliada sa Flora
di Mimmia Soro

Cara Sardigna sa carta De Logu
bogande a fora e ponela in usu
pro punire cussos chi hana s'usu
in s'istiu de t'allumare in fogu.

E cusso criminales piromanos
cun zertos pastores malandrinos
a s'ora ch'iscrican sos lominos
dassare bi devian sas manos.

E cando sicat fenu e tirat bentu
cussos chi frundini sa cicca atzesa
reduende in chijina ogno ricchesa
fetan sa fine de Santu Larentu.

Cun fogu subra e cun brajia suta
si godan su calore a fogu lenu
e comente su sole ascitat fenu
sa carena issoro enzat asciuta.

Solu tando germogliada sa Flora
cun aromas, profumos e colores,
e sa Fauna intonat sos amores
pro rendere omaggiu a Eleonora.