Sonnio chena colores
di Larentu Pusceddu

Sonnio chena colores
campos d'erba tzenerina,
arbores chena fozas,
rios d'abba niedda
e mares biancos, immensos.
Dae su monte, chena pesu,
lizeru bolo supra sa terra
inue sa luche de sa luna
mandat umbras indistintas.
E cando che ruen sas alas,
isortas dae su sole,
ti chirco in donzi locu,
in gutturos chena fine,
chi in picada s'isparghen
che ruches isformadas.
Ti chirco che cane mazadu
chi cheret dae su mere
carignos, pro ismenticare
sos corfos meritados.
Nemos t'at bidu
e in su pruere m'imbolo
e prango chen'alinu in coro.
Sas nues innieddan su chelu
e unu lampu luminosu,
sichidu dae unu tronu,
m'ischidat in su ludru.
In sa paca luche t'ap'idu
dormida serena e bella
acurtzu a mie, corcada
supra unu candidu lentolu.

(3°Premiu - "Meilogu" Puttumajore 1979)