Sonnios de pratta
di Tonino fancello

Muttimi intro sa notte galu amore
in custos sonnios mios chi mantenen
sa garria sos sentidos chi trattenen
fados anticos de seda e belludu
soe solu in s’aposentu mudu mudu
de tene intessiu jugo su sapore.

Muttimi galu amore in sas oricas
murmuttat galu su tempus d’incantu
torrat’a biu custu coro infrantu
dae custa vida fatta‘e milli sonos
solu sos basos tuos fini donos
chi m’isprican in sinu sas isticas.

Ojos de monte secas sas cresuras
de tottu sos misteris chi colados
paren in sa carena appaneddados
che ruches de crofariu a s’acunnortu
benimi accantu galu non soe mortu
istringhemi a cadenas chi misuras.

A frammarida galu cust’incantu
l’istringo che valore intro su punzu
sa notte chin sos ventos a murrunzu
mi porrit cudda allega intro su coro
e custu sambene‘alu‘e anticu moro
m’iscurret in sas benas no isco cantu.

Chin boches de sirenas sos cantares
si pintana che rajos in su sinu
abbratzami in su sonniu su camminu
diventat lisu chen’esse predosu
in conca su dilema valorosu
ti ponzo che reina in sos artares.

Fachemi cust’iscutta alu sonniare
son’irvaninde custas garrias mias
m’arrunban solu in manos sas poesias
po ti pintare che rosa‘e Sardigna
muttimi galu amore ses sa digna
intro su sonniu chi m’as chertu dare.

Culumba rara innida in sa vida
mi muttis in sa notte a luche‘e luna
pintada in cust’amore che solu una
ti toco in custu sonniu e ses ischida.

1 premio Logudoro 09-ottobre 2011