Sos assazadores

Bufant chena s’apretu e a piotu
atzertande si est bramidu alimentu,
e non refuzos de s’ arcanu imbentu
cun sabores fragosos de decotu.

Non los intzegat mischinu avvolotu,
si movent assazande cun assentu,
proite su manizu a passu lentu
sortit afficos de tenner a notu.

Cando jughent tirazu a cumprimentu,
appuntant in paperi sos inditos
e cun sintzera istima dant cossizos.

Imparu e ghia pro babos e fizos.
Da Soberanu ant esser beneitos,
subra s’artare pro divinu ammentu.

Giovanni Antioco Mura
Ilartzi, su 21 ’e santuaine 2005