Sos Astores
di Larentu Pusceddu

Sos astores an brincadu su mare
cun su bentu jerrile
e firmados si sun in sas pianuras
e in sas iscras fecundas.

A corfos de biccu ch’an catzadu
sos canes pastores dae sas gamas
pro rapinare sa cria;
in sas terras aradas,
che puddas danarzas,
s’an prenu s’iscarzu,
de semen costadu suore.

Dae tando non amus bidu prus
arborinos biaittos
caentados dae s’alunu de sos boes;
ne arborinos de arantzu doradu
in sos caentes beranos,
ne fracu de massajos,
in sas lozas
mudadas in garages,
ne mulios, ne appeddos.

S’impudile l’iscrarin
lampadinas frittas a su neon
anneuladas de lentore
chi no umidat prus erbas,
ne sa terra,
morta oramai…

Oniferi- premiu madonna de Soloai 2005 - Segnalazione