Tristesa mi ponet e aflitzione
sos ch'iscazzados 'e s'issoro terra
arribant in affollados barcones
fuinde de miseria et gherra.

Impauridos fuint de sa morte
in manos 'e traficantes assassinos
incappande in-d-una peus sorte
causada de manos 'e cainos.

Si affidant a manos criminales
bintos de famene e disperatzione
istuzzados peus de animales
chenze umana cunsideratzione.

Sa costa siciliana fiat vicina
s'impresa fiat bell'e che fatta
ma sa sorte cun issos ingratta
los hat isterridos in sa banchina.

B'est puru a chie faghet fastizzu
e la cunsiderat un'invasione
bidinde arribare mamma e fizzu
istremados faland'e su barcone.

Birgunza est sa peraula zusta
a chie hat dovere e vigilare
non cherimos pius zente issusta
mai pius tragedias in su mare.

S'Europa si nde samunat sa manu
comente Pilatu cun Zesu Cristu
su fattu dae issos est lontanu
tancant s'oju e nudda han bistu.

Isperemus chi su vile brigante
chi obbligat sos frades a fuire
si potada imediatu imbonire
e non s'idat pius unu migrante.

Ilartzi su 4 e Sant'aine 2013