(A sa zente de su Nepal)

Sos pardos si pintant
sinnande camminos biaitos
e sonant dillos
a lèbias nues
ca ‘ènniu est su tempus
de mariposas chi furant tintas
e ddas ammesturant
‘olande
in sos rios
cun sas arranas
e cantant
in nios
creaturas sena impilire
tzerriande sa mama,
sa vida.

E si lompet sa morte?

Sos meos pinzellos
impiastrant de mùrinu
mudos sartos
prenos de pruine
ca non podent disignare abes
e nemancu grogas sisias.

Sa zente est gherrande
e ‘inchidores cun bintos
alluent fogos
in suta de carenas
appilladas.

Apo a ispetare
un’ àter’ annu (ma ocannu no!)
a mi trodulare in s’erba de ògnia intina
e a gosare
po abbas lìmpias
in concas de granitu.

Menzione Speciale al Concorso "Peppinu Mereu" - Tonara 2015