In epocas anticas
mi contavat manneddha,
de cantu derramavan sos “Majores”.
Ma chin sas manos licas
lompian a-inneddha,
chin cantos sacrifitzios e dolores.
Vraicanne s’onore,
dromminne a su lucore
de sa luna, in custos sos “Pastores!”.
Rennidu han terra digna,
de-la mutìre Terra, sa Sardigna!

A-ziru chin sas gamas,
chin tazos e fiados,
dies e messes chentza bi ghirare.
E muzeres e mamas
chin sos chizos falados,
non podìan in locu repossare;
a donzi temporada,
o bida prassamada,
b’ìt carchi vorta inuve reparare.
“Tentadores de vida”,
oje bos han apertu donzi erìda!

Allattadu nos hazes notte e die,
bos det rispettu, chie cumannat; chie?

Ma dae canno su limussinare
a chie bos hat fattu mezzorare?

Han dadu a custu locu,
chin fizzos e chin fizzas,
sa mente abbista ‘e sos istudiados.
Oje latte chin focu
las innudan sas pizas,
son belle e dae totu irbandonados.
Ajò Sardigna pessa,
e tottu in-d’una messa
ca no irmentiches tempos passados.
Ca si juches sa pinna,
mobilios de linna,
son iscios chi si son sacrificados!

Torra sa dignidade
a chie t’hat dadu vida ‘e calidade!

Torra a ispossare chelu, terra e gama,
chin su pastore ch’est tottu una brama!

Ca sa gama cuntenta in campos vonos,
mudat sa vida ‘e canticos e sonos.

Sonat cuddha campaneddha,
a costazzu a s’anzoneddhu,
campat donzi viddhicheddha,
creschet cada pitzinneddhu.

Virde tottu, virde amadu,
prados bellos de cricare,
pastoreddhu oh affranzadu,
happas tue uve colare.

Happas bona ghiradura
po armentos e e fiados,
bastet cantos de tristura,
dae oje irmenticados;
latte e mele torret galu,
inat custu tempus malu!

Ca-li cheret dadu onore,
a sa vida ‘e su Pastore!

Nuoro, 31 ottobre 2017