Sos sentidos de s’Anima
di Antonio Maria Pinna

Sos pensamentos sun a s'anda e torra
in custa notte pasida d'attunzu,
che cacciuccios famidos a murrunzu
ogni tantu m'ammossan sa pettorra!

Sos ojos no agattan s'ingalenu
e bizan in sa notte a mor-istuda
tzimigosos,ch'esseran de viuda
da' pagu rutta in penas senza frenu.

Miro s'aera binnida e chieta
bella che mai, de lughes coberta,
chirchende de nde fagher s'asseberta
cale siat s'istella 'e su poeta.

In tanta immensidade lean bolu
sos sentidos de s'anima, chi cheret
serenidade pro chi cràs si seret
in littos d'amistade e de consolu.

E ruppo cun s'ojada in sas biancas
isterridas de lughidas giurìas
pro che furare cun sas fantasias
sa paghe beneitta 'e cussas tancas.

E curro che puddedru 'e prim'essida
in su saltu 'e sa luna a tottu fua
e cun s'ojada da' sa groppa sua
miro sa terra tott'a festa estida.

Oras e oras durat s'izadorzu
de custos pensamentos chi che furan
su bramadu drommire, e mi procuran
penas che paren puntas de puntorzu.

Su riu no s'iscanzat in sas laras
in custa notte limpida e serena:
sempre pensamentosu canto in pena
sos sentidos de s'anima. E sun caras

custas bideas chi pedin continu
avreschidas de paghe incantadoras.
Pro chi potta unu cràs in mezus oras
ispallattarelu a festa su sini.

(Pozzomaggiore)