Su Babbu – Sa Mama

A manu tenta

di Angelo Porcheddu (su Babbu)
e Benito Saba (sa Mama)

(Babbu)
In sa notte 'e su tempus galu oscura
si perdet su comintzu 'e s'esistentzia
ch'hat dadu avviu a s'umana erentzia
e dogni forma 'e vida in sa natura...
E su chi nos insinzat s'Iscrittura
lu tenimus in déghida credentzia
chi de vida sa prima alta fiama
l'hat atzesa su Babbu chene mama.

(Mama)
Ma si a cussos iscrittos ses credente
e léggidos los as fintzas a fundu,
cumpresu as puru su progettu 'e bundu
chi cuntzepidu at s'Onnipotente:
ch'a pobulare sa Terra de zente
una mama cheriat custu mundu
e dadu at a Eva sa nadia,
sa prima mama nostra 'e sa zenia.

(Babbu)
Però su Babbu Mannu Soberanu
restat sempr'Issu Donnu e Padronu
de su criadu ch'hat fattu in cunsonu
de s'esistentzia 'e su génere umanu.
A Issu pedis pane fittianu,
a Issu invocas s'ùltimu perdonu.
In oras de bisonzu a Issu pregas
e sa vida a su cherrer Sou intregas.

(Mama)
E sa Sacra Iscrittura narat ch'Issu
solu potentzia at a manu piena,
ma pro intrare 'e su mundu in s'iscena
de àere una Mama s'est permissu
e de sa Terra est bénnidu a s'abissu
in sinu a una fémina terrena.
Duncas fintzas su Fizu 'e Deu at suttu
latte a sa Mama ch'in sinu l'at giuttu.

(Babbu)
Sende su Babbu Amore infinidu
pro redìmere sos àtteros fizos
ispozat de divinos privilizos
su Verbu e de umanu l'hat bestidu,
chi sas penas terrenas hat patidu
supportende istragu e martirizos,
ma poi chi su Samben hat ispaltu
su Babbu l'hat giamadu a Regnu altu.

(Mama)
Maria Immaculada glorïosa,
nàschida cun su coro ermosu e santu,
che Mama 'e Deus in terra at pïantu
pro sa morte 'e su Fizu dolorosa,
ma sende a Deus puru Fiz'e Isposa,
ch'est assunta a su chelu atteretantu
e cun su Babbu in sa sede divina
l'imploramus che Mama e che Reina.

(Babbu)
Ma si da-e su chelu ti nde falas,
de sos babbos terrenos ti fentomo...
siat de sos chi dies viven como,
siet de sos chi bidu nd'han pius malas
in tempos chi giughian subra palas
su pesu grae de totta sa domo
in sos tempos de giaju e de bisaju
chi su babbu o pastore, o fit massaju.

(Mama)
Si pro su babbu fin tempos metzanos
pro sa mama fin tempos de apprettu,
ca sulena non fit mancu in su lettu
pro milli contivizos fittïanos
chi li prendian mente, coro e manos,
lassende pro su pasu pagu trettu,
ma cun s'ànima 'e mama sempr'atzesa
de onestade antiga e sabïesa.

(Babbu)
Che marineri de nàvigu espertu
ghiat sa barca fieru in su ponte
de cumandu da' ue 'idet de fronte
sos perìgulos in su mare abbertu
ch'ogni die cun sas undas su chertu
dêt bincher pro non perder s'orizonte.
Gai su babbu 'e sa familia unida
ghiat sa barca in su mare 'e sa vida.

(Mama)
Ma dae cand'in mare isparghet vela
e sa barca in cumone leat fua,
cun su lugore de s'anima sua
sa mama in sas tempestas est tutela,
ca de amore immensu sa candela
atzendet pro chi fettat lughe in prua
e sa barca non nadet in s'iscuru,
ma in su mare lùghidu e seguru.

(Babbu)
Chie a esser babbu tenet sorte
contivizat fiores e giardinu
e cun fide sintzera 'e paladinu
los curat e amparat fintza a morte,
ca cun dulche sentidu ìnnidu e forte
in coro e mente los giughet continu
e pro sa vida e su gosare issoro
prontu a dar'est su samben de su coro.

(Mama)
Su babbu giardineri bene cherret
in su giardinu sou a ogni pianta,
ma chie pesat cun pascientzia santa
dogni brione e cura li cunferret
est sa mama chi cun amore isterret
subra sos fizos nòbile sa manta
de sentimentos altos e de bramas
chi brottan solu in coro de sas mamas.

(Babbu)
D'ogni sentidu chi s'anima tanghet
in su babbu risàltana sos signos,
ca annoditan cun risu sos benignos
pessos in ue su male si franghet
e sa tristura in cara, si pianghet,
paret chi pintet ràntzigos carignos,
ca sas làgrimas de su babbu in chizos
toccan in fundu a s'ànima sos fizos.

(Mama)
Sa mama a lagrimare a bolta ispinghen
nïeddos pensamentos de astrore,
sebestende in su tempus benidore
nues chi de minettas su cras tinghen
e mirende sos fizos chi la chinghen
los basat pïanghende pro s'amore
e pro timore de s'oscuru 'enner
su lagrimare non podet trattenner.

(Babbu)
Ma sos fizos non sun giojas ebbia,
ne pro su babbu sun tottu consolos,
prite creschende ispinas de oriolos
bettan in coro s'umbra 'e s'angustia
e su lugore amenu 'e s'allegria
che lu tudat s'umbraghe 'e chentu dolos,
massimu cando 'e fizos s'indolentzia
s'intramat cun sa fritta indifferentzia.

(Mama)
Fintzamenta sa mama s'addolorit
bidende ch'in sos fizos isvanessin
sos annos innotzentes cando tessin
s'edade chi de mannos los colorit,
ma s'amore 'e sa mama mai morit,
nen sos fizos dae mente che li 'essin,
ca dae s'ora chi mama diventat
sa cara d'ogni fizu in coro imprentat.

(Babbu)
Pro chi sigat in terra umana erentzia
cantu s'òmine sa fémina contat
ca est s'amore 'e duos chi approntat
dogni esser a retzire s'esistentzia,
si puru in vida est gosu e sufferentzia
pro chie impignu d'esser babbu affrontat;
però s'hat bonu coro b'accunsentit,
d''estire pannu 'e babbu non si pentit.

(Mama)
In vida cantas féminas s'agatan
cun in s'ìntimu atzesas sas fïamas
d'ispera chi s'avvérene sas bramas
segretas chi cun ànsias allattan,
m'a bolta 'e badas penan e cumbattan
e morin in disizu d'esser mamas,
ca si puru in su viver las fastizat
d'esser mama ogni fémina disizat!

Nadende umpare

Questa poesia ha conseguito il 1° Premio al Concorso letterario "OTAVAS CURRENDE" a jobas (coppie) – BENETUTTI – 8 dicembre 2007