Su bene operare
di Salvatore Poddighe

1
D’esser giustu su votu lu mantenzo
cant’hat a biver sa persone mia
e chi s'alenu in su pumone tenzo
si poto passo in sa 'eretta via.
A cuddos chi no l'ischin los prevenzo
chi fìnas ch'hapo lughe in sa pupia
e chi non variat su sentidu meu
penso de dare cunfortu e recreu.

2
Si de gosi est su meu naturale
est ca gosi mi hat fattu sa natura.
Su bene ammiro e odio su male
so dispostu 'e su bene a tenner cura:
cun su coro benignu e liberale
l’educo s’ignorante criatura
e fina a cando connoscher lu dene
hap’ammustrare sa vida ‘e su bene.

3
Deo incoraggio sos disfortunados
e cando poto lis dao un’azudu.
Cumpato puru sos esagerados
chi los bido, mancari, e m'isto mudu.
A tempus opportunu preigados
prima ch’issos si ch’etten in su ludu
fatto connoscher sos insoro males
non sende totu ‘e sensos uguales.

4
Guai! S’eguales fimis totu
imis balladu a su matessi sonu .
Non fit mai finidu s'abbolotu,
pro custu est chi bi cheret malu e bonu:
unu issenziadu, unu idiotu,
unu dotadu 'e differente donu.
Tale coment’hat fattu sa natura,
unu de bene, unu de male hat cura.

5
Seguru chi non totu sos terrenos
abbitadores de su mundu intreu
non d'un'amore benignu sun prenos
mancari fizos de totunu Deu.
Sos de tinta niedda e-d-egumenos
o seculares puru a parrer meu
si faghen bider de coro benignos
ma de los istimare no sun dignos.
6
Sa veridade hat supremu valore,
fidele sorre 'e su bene operare.
Sa veridade in sos logos d’onore
andat continu pro si recreare.
Ue sa falsidade est in vigore
chircat sempre deretta 'e che passare
…………………………………….
residenzia eterna pro bi fàghere.

7
Sa veridade est giusta, santa e pura
sende mama benigna ‘e sa virtude
ch’esistit senza manza né bruttura
sa terrena giustìzzia concrude:
medit e pesat cun giusta mesura
a dogni falzidade ingrata e rude.
Sa falzidade a su falzu la zedit:
comente giuta pesat, giusta medit.

8
S'in custu mundu ogn'èssere naschidu
nd'eret esaminadu su valore
e in sa veridade esseran bidu
ch’est issa paghe cun eternu onore
nd’hian zertu concrusu e difinidu
de l'istimare cun fraternu amore
déndeli su valore e cuntemplende
ite est sa veridade a totu nende.

9
S’eren sa veridade postu in usu
fit isparida ogni malinconia
de tantos chi de issa han fatt'abusu
crònica diventende est maladia.
Tra seculare cun cùccuri-tusu
sa veridade est pro un'ingannia:
isfruttan cun suprema podestade
a dannu de s’intera umanidade.

10
Si veridades in mente e in coro
eret dognunu cunservadu e tentu:
dian esser sos séculos de s’oro
de cuddu bezzu e nou Testamentu.
Intantu lu biàsimo e deploro
s’insoro fagher chi in su mundu han tentu
comente lu bidimos trattu-trattu
chi faghen dogni die e hana fattu.

11
S'esseren fattu coment'han iscrittu
sa prus logica base essenziale
de dare a totu dirittu uguale
e d'haer totu uguale profittu
sos ch'han iscrittu prima hana traittu
sa veridade ch'est cosa immortale.
E si naran chi deo los infamo
est ca su falzu che issos no amo.

12
Sa giusta veridade, no impostura,
comente su Supremu l'hat dettada
pro dare lughe a dogni criatura
chi l’esseren iscritta e preigada
a malos e a bonos a mistura
pro chi totus l'esseren osservada
de la ponner in pratica e in usu
e niunu nd’esseret fattu abusu.

13
A dogni sou terrenu abitante
gosie faeddadu hat giaramente:
cherzo chi siat d'amore indulgente
benignu ‘e coro e de su bene amante.
Su de sa terra produttu bundante
nesit de goder in comunemente.
Dende sos santos lògicos Vangelos
s'est retiradu a su regnu 'e sos Chelos.

14
S’ismentighesit su prus importante,
d’imponner sa severa dissiprina:
su trasgressore ‘e sa legge divina
punidu chi resteret in s'istante,
de morrer in sa rughe agonizzante
oppure ‘e lu redùere in chisina.
Pro si nd’esser de custu ismentigadu
zertos unos sa legge han violadu.

Sestri Ponente, 28 Marzo 1933