Su bene prus mannu
di Renzo Rosa

Apo chilcadu prendas, benes mannos
po totta sa vida, apo chilcadu
e in s’isettu lestru ch’est coladu
su tempus chi m’at dadu solu affannos

Chilcande de estire mezzus pannos
finas a tie apo trascuradu
e tue m’as semper perdonadu
e dedicadu m’as, sos mezzus annos

andada ti che ses, isposa mia
po semper, finidu as de penare
ca de sos anghilos, che ses in mesu

Como chi mancas tue l’apo cumpresu
chi non baliat benes a chilcare
su bene mannu... in domo lu tenia!

(menzione d’onore a Flussìo)