Su binu

Da sinu ’e binzateris ses naschidu
allatadu cun suores e afutas:
daghì maduras in terras assutas
nasches biatzu, cresches saboridu.

Pares masedu intro carrafinas,
las ortulant seguros chena mutu,
cando che finis, mancari a succutu,
intro s’intragna briosu caminas.

Si ch’istuponant fiascu e ampullas
e de bufare a prou faghent finta,
issu chietu si la leat inta
proite bessit fora e faghet brullas.

Nuragus, granatza e muristellu,
vermentinu, pascale e nieddera,
sunt gradessidos protzedint ispera,
impare a malvasia e muscadellu.

Attrividos ti cherent aburridu,
cun sa malitzia ant leadu lutas,
non tenent contu de tempos e mutas,
pares lissia trulu iscoloridu.

Abba e meghinas in logu apartadu,
lassande a banda terra e istasones,
faghent pitzazu, li ponent tupones,
bufant luego binu seberadu.

Oe s’apinnicu ’e assazadores,
impitados che su dottore antigu,
torrant in vida su menzus amigu
cando perdet aficos e sabores.

Cossizant pastinonzu ’e binzas noas,
chi attent sos urdones a pariga,
imbitzent e accuntentent chena briga,
solu intro cubas apretent sas doas.

Chi no at binzas e faghet intrulios
produit sol’ispruma e abarolu
non dat seguresa nè cossolu,
li addeghent murrunzos e isulios.

Giovanni Antioco Mura
Ilartzi, su 18 ’e santuaine 2005