Su càntaru ‘e sa vida
est calande a succuttos,
non bessit pius abba da’ sa ‘ena.
Cun sa mente abbramida,
ànima e coro assuttos,
mi remuno de gosu calchi rena.
A sa muda nd’est bénnida
sa muta ‘e pilos canos e renchénnida.

Coladas sunt sas bias
de bolare in sas chimas
pius altas, a subra ‘e onzi nue.
Totu sas ganas mias
in su pettus sunt frimas,
bessire prus non poden da incue.
E ingroghint sas fozas,
lassàndemi sas àlbures ispozas.

Non poto pius cùrrer
subra s’erba ‘e su padru,
in cambutzos m’istringhent sas cadenas.
Chie m’at a succùrrer
in custu tempus ladru
po mi ch’istesiare dolu e penas?
E si dimando azudu
mancu su chelu intendet, surdu e mudu.

Ma una lughe atzesa
m’est mustrande s’andera
ube agattare paghe e assulenu.
Prus lèbia est s’etzesa
cun in manu s’ispera
chi m’est bintrande in coro a lenu a lenu.
Unu mundu m’imbento
ube de su chi tenzo mi cuntento.

De su sole a s’occasu
goso su tebiore,
ammentàndemi abréschidas prus jaras.
De unu durche ‘asu
intendo su sabore
abbarradu imprimidu in custas laras,
cun faeddos d’amore
chi fint totu po te, amadu frore.

1° Premiu - Prémiu Literariu “Gurulis Vetus” – Padria 24/08/2019