A Giangavino Irde in risposta a

Su cunsolu de sa luna

Su chelu firmu, chena mutamentu,
apprensat in tottùe custa pianura.
S’erba irde la movet un’alientu
chi lenu lenu calat dae cresura
de mattas fittas chi paren de alghentu.
Tremit su buscu intr’ ‘e sa foza sua
ca a dogni nae li mumrurat su ‘entu.

A su sero chiscuzan a sa cua
sos puzones chi b’ana fattu assentu
poi chi s’aria an pintadu a bolu e a fua.
Est s’ora chi nde torrat dogni ammentu
A s’omine chi acabat sa die sua
de disizos, de ingannos e iscuntentu.

Sa vida curret che abba de funtana,
fusida passat che rundine in bolu…
Ma si a de notte accudit andantana
sa bianca luna nd’ap’ a àer consolu
abbaidandela a pius de sa ventana.

****

S’atunzu de sa luna

O zentile Gavinu chi consolu
a de notte ti dat sa bianca luna
cando gana de sonnu no’ as peruna
e t’ammentas de rundines in bolu.

Tando che melodiosu rusignolu
su cantu ti ‘nde pesat tott’in d’una
ca s’animu restadu a sa diuna
de ammentos e sentidos at oriolu.

E in campagna ti pares in Iscanu,
subra un’albure d’elighe o de olia
solitariu cantande a su manzanu.

Gai ch’ispidientas sa malinconia,
ninnadu da sos nuscos de su ‘eranu
ti che drommis cuntentu che ninnia.
……..

Deo puru, chi so’ mesu furisteri,
cumprendo su disizu de un’antzianu
e risposta li torro volentieri.

Ma si comente, caru cumpaesanu,
no so’ poeta ma so’ cantoneri
ruzzu restat su versu e no’ galanu…

A pustis chi torradu ‘nde so’ a Iscanu
semper boidu l’agato su tinteri,
tenz’asiu de afroddiare in su paberi
ca tantu de poesia no’ b’at sentore.

Puru chi sia nebode ‘e cantadore
sa Musa m’at lassadu in carestia
e su pagu d’erensia chi tenia
est como atrofizada che s’ambidda.

E ad’esser po su clima chi at in bidda
chi rundines ch’at pagu, e sun’ cuados
no’ solamente in chelu sos isteddos
ma culilughes puru in sos cunzados.

Sos “media” s’an pappadu sos chelbeddos
però za nachi semus informados…
Bivimos cust’atunzu segregados
in albures, che fozas… rassegnados.

***

Iscanu, atunzu 2020 - in tempus de Covid