Su dillu

di Benito Saba (2006)

Semper ammento, bajana orunesa,
sos ojos tuos límpïos, fïeros,
in s'intrinada giaros verdaderos
dïamantes de cálida lughesa...

Arressende su dillu cun lestresa
m'as pretziadu a ballare e sintzeros
in amistade fin sos tzinnos meros
e galanu su trattu in cara atzesa.

Sa chiza tua ermosa fit cumprida,
carignosa... aggarrendemi sa manu
s'istudïante istranzu as attiradu,

sa turra 'e sa manca mia arrimadu
t'as accua a su sinu… E fit beranu...
Rosa mi ses in coro fïorida!

Benito Saba

Questa poesia ha conseguito il 2° Premio all'VIII Ediz. del 'PREMIU PATADA DE LITERADURA SARDA' - Setzione Poesias in rima - PATTADA - 2006