SU DOVERE DE AMARE E DE ISCHIRE
Vertude e Connoschensia po achistare
o Frantziscu a Iscanu as dassadu,
logos e zentes noas as chircadu,
terras istranzas in istranzos mares.
A mie in Paisos Bassos de istare
cun fizos e muzere m’est tocadu,
ca puzone chi nidu at fraigadu
atesu meda non podet bolare !
Vias divressas depimus sighìre...
ma pregamos su Mere Divinu
a portos bonos de nos conduire.
E pro sa patria chi amos in sinu
su dovere de AMARE e de ISCHIRE
si cumprat in su longu, aspru caminu !
*** *** ***
Risposta de Tzitzu, in biazu pro Marocco,
sos primmos de Maggiu de su ‘97
CONNOSCHENTZIA E AMORE
Pro mi fagher benigna calchi Fada
brusiadu apo s'incensu e s'abuleu
e pregande chi siat a gloria 'e Deus
ti fatto a sa cantone una torrada.
Zesu Cristu chi fit unu zudeu
sa domo sua l'iat abbandonada
e un'atera vicinu nd'iat fraigada
ca troppu in cussa domo fuit s'oddeu.
Sa zente preferiat diseredada
a dogni malu iscribu e fariseu,
ca mos ammentan Luca cun Matteu
ch'istrinta po su Chelu est cudd'intrada.
Su Regn'e Deus no est su Colosseu,
no b'arrivat che a Roma ogni ficcada;
e mai in s'ogiu 'e s'agu ch'est colada
una pantza chi abbundat de ozu seu.
Za est beru chi divressa amos s'istrada
ca tue in cussu nidu no as peleu;
umile deo peri su mundu intreu
mi retzo a di chi torro un'istoccada.
Perdono dogni offesa, e si so “reu”
atzeto da s'amigu iscatulada:
ca Amare est via chi cheret praticada
po Ischire veridade chena neu.
Veridade chi oe no’ est apretziada
ca fintzas a la narrer paret feu,
ma deo, ca m'est tocadu cuss'impreu,
a ognunu franca e tunda l'apo nada.
Cun Dante chi assimizat Cristu a Zeus,
cust'ultima ti nalzo pius velada
e gai serramos bene sa cantada
pro chi su male no diventet peus.
Cun Eros e Sophia, amigu meu,
deo penso chi dovere no bi nd'ada:
a unu "coro zentile" l'est re-creu
cando su fruttu issoro leat e dada…
E po l’intender fintzas s’Empireu
ti lu ripito in rima retrogada:
semper recreat unu zentile coro
a leare e dare de su fruttu issoro !
*** *** ***
