Su 'ezzu de Bagdad
di Gianfranco Rosa

Su ’ezzu, ciccande tobaccu,
at balziadu sos ogios a chelu;
e su chelu est prenu de lampos
e tronos, chi assustan su ’entu.
Nues nieddas si pesan dae terra
in cuddane, in s’or’e zittade.

Su ’ezzu, sa tzappa a bacheddu,
nde ruspiat a terra tobaccu;
una ’olta, in sos annos passados,
balziait sos ogios a chelu
in sa notte isteddada,
isettande unu raru signale
de nues unfradas de abba,
amigas de s’iscassu laore.
Oe sas altas turres de nues
no battin prus abba, ma fogu!

Un’attera gherra, de tantas,
allupiat cust’aridu logu.

Su ’ezzu annaigat sa conca
e ruspiat a terra tobaccu,
sende chi accanta sa radio
ispalghet peraulas de gloria,
prommitit sa inchida tzerta.
Ma ischit dae ora, su ’ezzu,
chi sas preigas solennes signalan
sas dies de famene nieddu,
e sas nues grogas annunzian
s’orrendu isconfortu ’e sos luttos.

Annaigat sa conca, su ’ezzu,
e ruspiat a terra
ca est culp’e sa terra, a congruos,
si proen cussas bombas,
si morin pizzinnos a faschias,
si occannu no messat laore.
Posca frittit sa conca, su ’ezzu,
e sighit su lentu tzappare
intantu chi lughet su fogu ’e s’inferru
...in Bagdad.