Su innidu colore ‘e sa paghe
de Antonio Maria Masia

(Versi liberi per la pace, premio Città di Oniferi 1995. La pace vista con il colore bianco immacolato, “innidu”, un aggettivo bellissimo che significa senza macchia. Un colore che si contrappone al nero e che dopo una riflessione sulle storture di questo mondo, esplode in una luce solare che illumina i volti e fa sognare un mondo in cui tutti si stringono per mano….. )

Assustados pitzinnos pianghende
e ominnedos gherrende in tottue
biancos e nieddos, rujos e grogos
abbaida!

E ojos tristos de feminas violadas
e famidas criadureddas morzende
rujos e grogos, nieddos e biancos
abbaida!

E tancas coloridas de sambene
e abbandonados betzos aisettende
e giovanes andende chen’ispera
abbaida!

Ahi! Cantu dolore in s’umana zenia
pro dare cun odiu unu solu fruttu:
ch’hat de sa morte su nieddu colore!

Ei sa paghe chi dae sempre disizo ?
Ite colore hat sa paghe prommissa,
dae ognunu traita e ismentigada?

Pintad’est issa ‘e lughe soliana
ch’illuminat sas caras dogni die,
hat brios de puzones in s’aera
e sabore ‘e laras disizadas
profumos hat de fiores in beranu
e sonos de rizolos brinchitende
no hat lacanas a zente furistera
ne fusile ne fogos ne ingannos.

Est unu sònniu
chi sempre tenz’in coro:
de omines chi s’istringhen sa manu
pro nos dare
unu mundu chena gherra.