Su leone e-i s’ainu
Padre Luca Cubeddu

Discurret su leone seriamente
A sa fera intimare aspra battaglia,
Pensat pro destruire sa canaglia
Cantas troppas bi diat inviare,
E concluit chi solu at a bastare
Giutende in cumpagnia unu molente.

Faghet consultu cun su pensamentu
Coment'at a isperder tanta fera.
Si cumbidat su 'oe, at passu lentu:
Sa craba chi no at ungias, no est gherrera;
S'abile est lestra pius chi non bentu
Ma su valore sou est in s'aera,
Su riu, sas mattas forte impedimentu
Li faghen a sas alas pro bolare.

Su caddu est animosu et gherrizante,
Però non faghet proa in logu tortu:
Su corvu tenet boghe cracariante;
S'unturzu at ungias, ma de pagu importu:
Ambos pasteris d'iscarzu pesante,
S'ismentigan ind'unu corpus mortu.
S'astore e tilibriu deliriante
Chircan puddas, e no ischin gherrare.

Tando s'incaminesit a su padru
Addolendesi in costas cun sa coa.
Bidet unu molente appoderadu,
Conchi mannu, orijudu a tota proa:
Amigu, segnor asinu, l'at nadu,
Beni chi tenzo 'e fagher cosa noa,
Tancas, cunzados tot'ap'inghiriadu
Nisciunu che a tie a m'aggradare.

A s'intender su re ‘e sa foresta
S'ainu faghet de su milindrosu,
Movet sa coa e inchinat sa testa
Ind'un'attu tzivile et rispettosu:
ite de me si faghet burla o festa
Ca mandigo erva o carch' 'ardu ispinosu?
E no mi mancat mai una tempesta
De frunzas pro mi fagher ismontare?

- Attentu a su chi naro, isculta e caglia;
Imprimidilu bene in sa memoria,
Oe a sa fera do tale battaglia
Chi at andare famosa in dogni istoria.
Non cherzo cane ne porcu de iscaglia
Solu cum tegus tento sa vittoria,
Tenzo ungias pro isbarrare una muraglia,
Ite contu sa fera at a leare?

Altzat su murru a chelu, altzat su fronte
Riendesinde s'orijudu pegus:
Det ischire sa fera de su monte
Chi oe la tenet de fagher cum megus,
Sa 'oghe mai in totu s'orizzonte
Det sonare a innanti e a in segus,
De manu mia est pretzisu chi conte
Cantas fin in cust' 'adde pro abitare.

Su leon'andat, e leat sa posta
'Ue semper soliat fera bessire.
S'ainu s'est corcadu in mesu costa
Ispettende su tzinnu pro imbestire,
Appenas at intesu sa imposta
Luego dat printzipiu a intinnire,
Non si movet de ae cogorosta
Pro paura s'ismentigat de 'olare.

S'indadritzesit de punt"e ischina
Segat chessa, mudeju e olidone,
Curret, brincat pedra e ispina
Isparende dai segus su cannone.
Tremen sos chercos dae raighina,
S'isturdit su crabolu e su sirbone:
Paret chi tota s'adde andet in ruina
E nde ruan sos montes subra a pare.

Comente de s'attunzu e de s'ijerru
Cando de luttu si rivestit s'aera,
Nues ispissas in colore 'e ferru
Lampan, tronan, tempestan de manera
Chi paret chi si movan chelu e inferru,
Ogni alvure in su littu e ogni fera,
Tale fit de sas baddes in s'inserru
S'orriu molentinu pro ispantare.

Cando curret cando a passu lentu
Cun sa 'oghe terribile e ispantosa,
Tota sa fera est posta in movimentu,
Timet, tremet et fuit paurosa,
A pes de su leone a chentu a chentu,
Ruent fertas de s'ungia vittoriosa,
Chi piaga profunda e sambenosa
Abberit chentz'isettu de campare.

Inue bogat mortu unu sirbone,
Inie unu chervu, incue unu crabolu,
Ruet abbertu in costas su matzone,
Su lepere pro ispantu est mortu solu.
Tantas nd'at postu in terra unu leone,
Ch'as a narrer sun medas, e ite dolu!
E-i s'ainu mannu fanfarrone
De s'allegria non podet istare.

Istraccu su leone cumandesit
Abbasciare sa 'oghe de una 'ia,
Si cagliat su molente e preguntesit:
Ite cosa li paret sa 'oghe mia?
- Si non ti connoschere, rispondesit,
'Eo puru timende fuidu fia,
Sa boghe de zigante cumparzesit
Ma ses una frommija in oberare.

S'ainu tando pius insolente,
Pro dare a bider chi tenet bravura,
Curret a tuiu tesu de repente,
Sos fiancos ponzende in apprettura,
E iscappat unu tiru onnipotente
Chi tremet su leone de paura,
Però li mustrat ungias e-i sa dente:
Cun megus non ti ponzas a brullare.

(Pattada 20/03/1749 – 12/01/1829)