Su Lerozu

Ite presse mi pones, tichi-taca,
cun sos bàtidos ch’intran in su coro?
Oras, minutos pretziosos che oro
curren che bona, fidele teraca
chi no’ at pasu, mai est istraca,
no’ la corbellat perunu discòidu.
Su lerozu m’avisat: “Dadi còidu!
No abarres a passu de lumaca!”.

Ite presse mi pones, tichi-taca?

Ite mi pones, tichi-taca, presse
chi no’ resulto a ti currer fatu?
Cuddu motu pressosu m’est ingratu;
tocat chi coglionare no’ mi lesse
e calchi ‘olta molies a s’imbesse
po chi tenza prus tempus e prus vida,
po giogare intrea sa partida,
acudire a totu chi resesse!

Ite mi pones, tichi-taca, presse?

Tichi-taca, ite presse mi pones
sende sas cosas lestras male fatas?
Cando sas oras sun pagu adatas
no’ cuncordan ne rimas ne cantones!
Duncas leadinde sos isprones
e dadi ater’una regulada:
a fagher una bona resultada
imprean meda finas sos campiones!

Tichi-taca, ite presse mi pones?

Tichi-taca, mi pones presse ite
cando deo dia cherrer pius pasu?
Cando su tempus meu est a rasu
no’ b’est su tantu, no, chi mi b’impite:
regulare dia cherrer sa vite
po l’adatare a piaghere meu.
Ma su lerozu lu cumandat Deu
e a Issu non b’at de fagher lite!

Tichi-taca, mi pones presse ite?

……………………………………

Curre! No’ tenzas pasu ne frimmesa!
No’ ponzas cabu a su ch’apo nadu!
Semper chi cuddu passu as abbacadu
nd’est falada, puntuale, sa ‘etzesa!

Antonio Piras