Su male iscuru
de Rosina Cossu

Canta sufferentzia in custa vida
chena sonnios,chimeras e afficos
peruna foza irde,ramos siccos
ammantada de ingannos,atturtida.

Biso duas alas doradas pro bolare
e ancora respirare frisca aera
comente puma lezera,lezera
su dolore mi faghet olvidare

in coro naschent tando sas isperas
paret su chelu de isteddos luminadu
e como chi su sole ch’est faladu
sa luna giarit milli camineras

tando torro a vivere in badde amena
pintada abberu de milli colores
ue su nuscu discansas sos fiores
un'atera m'intendo,sò serena.

E penso chi su male est annientadu
su chi occhit sa zente silenziosa
no importat si umile o famosa
isse a tottus su risu hat leadu

Ma,cando penso insegus a torrare
torra m’afferrat cussu male iscuru
mi serrat comente serrat muru
e mi truncat sas alas pro bolare

Penso tando de che l’ettare a mare
pro chi restet in sos abissos prego Deu
su chi naro,l’isco,est meda feu
ma Isse già m’ hat a perdonare.