Como chi s’istade
ch’est finida
Su sole colat prima a si corcare
S’urtima rundine puru ch’est partida
Chircande su eranu passàt su mare.
S’atonzu puntuale est arrivadu
Cuminzan sas aéras a infriscare
Su massaju attentu l’at notadu
Est tempus de pensare a semenare.
Sas primas abbas chi sun’arrivadas
An consoladu sa terra sidida
Preparat sos marrones e arbadas
Torrat a cumintzare sa partida.
Su trigu semenadu cun amore
S’isposat cun sa terra in armonìa
E pro lu beneire su suòre
Sos primos de su mese ’e Sant’Andrìa.
In sutta de sa terra fecundàda
Sa natura cumintzat sa faìna
In manera de semper collaudada
Morit su ranu e naschit sa piantina.
Tottu in sa natura s’est firmadu
S’ierru frittu non cheret finire
Su trigu puru paret abbaccàdu
Ma in sutta sighit a puzonìre.
Arribat su eranu amorosu
Sas abbas pretziosas de arbile
Comente narat su ditzu famosu
Onzi uttiu, est de trigu unu barile.
E puzonit ancòra rigogliosu
Comente semper faghet a s’antiga
Su massaju l’innetiat orgogliosu
De onzi puzone naschit un’ispiga.
Lampadas unu mese delicadu
Su trigu est cambiande de colore
S’omine pensat cantu l’est costadu
Pro onzi ispiga un uttiu de suòre.
Pro onzi ispiga una preghiera
Pedit gratzias a DEUS onnipotente
Li domandat de faghet a manera
De lu salvare de fogu e malamente.
Su campu est unu mare indoradu
S’oju non si satzat de abbaidare
Su massaju lu mirat incantadu
Paret lastima su ’e che lu segare.
Su tempus ormai nd’est
arrivadu
Manzanu chito s’intrada a messare
Sos mannos sa frache an preparadu
E sos pitzinnos prontos a ispigare.
Sas manigas bene sistemadas
In sos carros faghènt bella figura
Su massaju si las at carrigadas
Cun solita peritzia e bona cura.
Guidande sos boes a su
destinu
Paret chi li netzet cun recreu
A tottus sos chi incontrat in caminu:
“Mirade, custu est su trigu meu”.
A s’arzola finalmente
est arrivadu
Sa zente faghet festa gioiosa
Su massaju cumoviu at abbratzadu
Sos amigos, parentes e isposa.
Su trigu bene in terra
sistemadu
Sos boes cumintzana a triulare
Cando est tottu bene pistadu
Ispettant su ’entu pro lu ’entulare.
Sos saccos prenos de ranu
maduru
Pro su massaju est sa paga bramìda
Che los sistemat in logu siguru
S'incunza est fatta e s’annada finida.
Custu trigu est unu bene
mannu
Fruttu de trabagliu e de suòre
Assigurat su pane tottu s’annu
Gratzias a DEUS e a Santu Sidore.
Ilartzi,
su 14 de Triulas de su 2013
|
