Su monte subra ‘e idda mia
di Salvatore Enne

Cando m’achero dae s’artu monte,
a milli e pius metros de altura,
osservo cant’a fattu sa natura
dae unu a s’atteru orizzonte;

sas arbures ammiro, sas forestas,
martigusas e ruos, medas mattas
verdeggiantes tottu las agattas
e i sas feras bi faghen sas festas.

Dae sa punta subra de idda mia
si bied pius de mesu campidanu
e s’innamorad s’omine galanu
cand’ied de sa terra sa maghia;

si bied unu campu laoradu
cun sas ispigas de bellu colore,
e su massaiu infust’a suore
est cuntentu pro su ch’ad semenadu.

Si bien’onz’ispezia ‘e terrinos
de idda mia e logos furisteris
e s’annotana tantos binzateris
e rosas profumadas in giardinos.

Medas rios si bien’e funtanas
da subra custu monte, amigos mios,
da ue intendo sos giovanos bios
cantande muttos pro sas baghianas.