“Car” in ebraicu est s’isposa
“melos” cheret narrere poesia
cantamus tott’umpare a Maria
Cun boghe giara e melodiosa

“Carma” est giamada sa funtana
e “oleos” sa misericordia,
Mama sese de vera cuncordia
odiu e peccadu Tue sana.

Su monte ue abita Maria
famad’ in s’ebraica istoria
attidi a nois sa memoria
de su famosu profeta Elia.

Preigat contra su feu cuidadu
de sa mala reina Gezabele
femin’ e malas trassas e crudele
chi a Baal altar’at dedicadu.

Pur’oe che tando , amigos caros,
semus in tempus de idolatria:
sos veros cristianos sunu raros.
Ma sos fraigamuros de Maria

‘e Carmelu, cherene esser faros
de fide a s’ ittiresa zenia.
Tott’abbandonemus ogni neccìa
chi nos at procuradu tempos malos.

Mama de amore e veridade
in terra e in chelu ses istella
faghe chi s’evangelica novella
brotede cristiana caridade.

Siat ripettadu ogn’anzianu,
sa vida in sas intragnas amada,
sa falta de trabagliu, eliminada,
prest’ogni malaidu torret sanu

Valores veros a s’umanidade
Maria nos giamada a pregare
pro chi s’amore pottada durare
in sa familiare soziedade.

Maria Mama de sa vera vida
prega pro tottu nois peccadores
de ognunu e nois sos dolores
leache, dae Deus assistida .

A su Carmel’enimus a buffare
s’abba cristallin’e Veru Amore,
Maria, est Mama ‘e su Signore,
isparghet grascias, in cust’altare.

Giama sos chi amus in terr’amadu
in custa esistenzia terrena,
Mama invocada Grascia Plena,
a gosare su chelu preparadu.

Festa del su ” CARMELO” 2014 don Tonio Sau, rettore de su Coro Immaculadu
Tattari-Ittiri 16 tiulas 2014