Su pedidore istranzu
di Larentu Pusceddu

Cando in sa carreda colaiat su pedidore
cun su Santu, in nitzu, apicadu a trucu
e sa bertula lichida betada in su coddu,
mesu tzecu, bruttu e istratzuladu,
sas feminas s'isserraian intro sas domos,
ca in isse bidian sa morte bandulera.
"Allargu preucosu, manica ludru!!"

L'abaidaia in sos ocros lacrimosos,
inue bidia s'affannu de su massaju
chi su focu l'at brusiadu su laore,
inue bidia sa tristura de su pastore
chi sa pesta l'at isperdidu sa gama,
inue bidia su disiperu de s'artisanu
chi pro disgratzia at perdidu sas manos.

"Pro more de Deu, aberidemi sa janna!
Dademi unu cantu de pane in caridade
peri chi siat asseadu o in pipinidas.
Aberide sa sos janniles, non timedas!
Cherzo de abba unu groppu, so sisidu,
sapunadelu in lissia su tassone.
No importat! S'offenden solu sos maccos.
Jeo so miseru e m'est mastra s'umiltade."

E ziraiat sa bidda, su pedidore istranzu,
isgranande a sas domos, friscadas a su colare suo,
su Rosariu chi sol'isse connoschiat,
dettadu dae su male e dae sa gana.

Oe mi abizo chi sa piedade mia fit istintu,
jeo puru so pedidore: pedidore de vida.

(Menzione d'onore - Mores 1980)