Appo a degheotto annos emigradu
Pro chilcare tribagliu in terra anzena
Ma a tie Isula incantada e serena
Non t’appo mai in vida ismentigadu

Comente mai podia ismentigare
Sa terra ue sos natales appo tentu
Baddes Montes bellos punta a bentu
Cun sa bellas costeras de su mare

Sardigna istimada bella e cara
Cun s’istoria immortale ti faghes
Tue sola in su mundu às sos Nuraghes
De fronte a su Gennargentu e su Limbara

Da sa costa Ismeralda a Muravera
Da su Poetto a Santa Catterina
Da portu Alabe a Bosa Marina
In s’istrada D’Alghero e S’Alighera

Sas festas puru las penzo continu
Chi sos Sardos onoran cun fervore
Nuoro tene su mannu Redentore
Sedilo cun S’Ardia onorat Costantinu

Sardos Sardas chi sezzis in tottue
E cuntentos de leggere sardos cantos
Fininde sos innoghe e sos de ingue
Bos saludo de coro a totugantos

Parigi
Santu Aine 2015