Su propriu celu
di Marinella Sestu

Mi suat in sa cara
s'atongiu de su mari
asullu frori imprentau
de sa luna partèra,
prenda stimada
appuntada
a su sinu sene fini
de su celu.

Su propriu celu sprigat
chini at pigau punta de peis de sa vida
ludu e famini a corona
de pensamentus axedus.

Pregadorias sene boxi
aporrint a oghiadas fui-fui
sortis sene orizzòntis,
passus lebius
allisant su tempus
sene pasiu e sene beridadi.

Unu sulidu prus forti e prus biazzu
de is orus dei is arrugas marrias
pruinis e follas ingroghìas
fait baddai
unu certu ballu tundu infrocchittau …

E de sa terra limpiada de cadenas
sa cara de unu nfrori s'amostrat
a luxentai de speru sa mudesa
de custu mericeddu affriggìu.

Soffia sul mio viso/ l'autunno del mare/azzurro fiore cinto/dalla luna materna/gioia amata/attaccata/all'infinito seno/del cielo./Lo stesso cielo riflette/chi ha preso i calci dalla vita/fango e sangue a corona//di amari pensieri./Preghiere senza voce/porgono a sguardi fuggenti/destini senza orizzonti/fragili passi/abbracciano il tempo/senza tregua e senza verità./Un soffio più forte e più gioioso/dai bordi delle strade scarnite/polveri e foglie rinsecchite/fa ballare/un certo ballo tondo in allegria …/ E dalla terra sgombrata di catene/il volto di un fiore si mostra/a risplendere di speranza il silenzio /di questa sera appassita.

Segnalazione di merito al "Quartucciu 2011"