-sonettos-

I
Su sard'a emigrare cando tuccat
giughet sa cara 'e colore giambada
ca lassat sa familia abbandonada
e non connoschet s'intrada ch'imbuccat.

Preoccupadu, a bucca serrada,
in salia sa limba s'isciuccat
e po si fagher forte si che ciuccat,
ma s'anima est sempre angustiada.

In s'abbratzu raccumandan a iscrier,
però isse sa cara si che 'oltat,
no ischit si piangher o si rier!

Poi su trenu, pienu l'agatat
de emigrantes che issu; si cunfortat
e paret chi viaggiu 'onu fattat!

II
Arrivadu a destinatzione
chi agatat su tribagliu, luegamente
a sos suos, allegru e surridente
iscriet unu bellu litterone!

Andende a impostare 'idet sa zente
allegra, passizende e a cumone:
babbos, mamas e fizos, cun rejone
si frimmat e tando 'olat cun sa mente:

sos caros suos lontanos e solos
sena su sou amabile surrisu
e in mesu de pena e oriolos.

Giughet presente su surrisu issoro,
ma ca fisicamente ch'est divisu,
pianghet tando in ojos e in coro!

III
Sa busta ch'hat in manu non li fuet,
mancari siat tremende che canna.
De ambos ojos ua lagrima manna
subra sa busta 'e sa littera ruet.

Ma sa lagrima manna no est cundanna,
ne indiritzu pro nudda distruet:
comente che li ruet che la suet
passendel'a sa littera in Osanna.

Sas litteras cunservat, tottu cantu
su sentimentu de cussas lagrimas
e curret a ue est s'atteru piantu.

Send'unidu appare a sa littera,
non las dividit ne mares, ne chimas
ca sun su fruttu de s'istima vera!