Su sensu de s'amore
di Larentu Pusceddu

Milli formicas
sun dae fundu picadas
a carinnare sos mermos
e a mi serrare sos ocros.

E disizas feminas ermosas,
nidos nuscosos,
sinos che melas
e paraulas de amore,
ocradas ardentes,
promissas mai nadas.

E palpitat
s'ardente Natura
in sa parma lizera
de sa prima amorosa
e torrat minuda
boida de sos ranos
isuliados luntanu
in d'un'arcu invisibile.
E intrat
in gruttas prufundas
connottas e no,
sicura de acatare acoglientzia
che semene in sa terra.

Issa est via,
semper via e chircadora
de noas camineras
ca su nou est prus bellu
e lu pensat, sicura.
Est pacu connottu
su sensu de s'amore
e su disizu isfrenadu
de unu corpus diversu
de incastrare in su tuo
che sa frama in su truncu,
che sa morte in sa vida.

(Menzione d’onore – Puttumajore 2006)