Su Sindagu 'e Bolotana e su ladrone pentidu

In su paisu de sos corrilentos
unu sindigu bonu bi tenian
e ad' esser po cussu chi vivian
tottu soddisfattos e cuntentos.

Che unu babbu, li usain rispettu
e tottu a issu li fun fizzos,
los azzuait e daiat cussizzos
cando li cunfidain unu segretu.

Una die Giuanne Palittone
seriu s'est cun issu cunfidadu:
"Deris a una domo so' intradu
e nd'appo furadu unu cascione.

Ma so' timinde d'esser iscopertu.
Azzuedemi, fettet su piaghere!
Ca si a l'ischire 'enidi su mere
mi faghet sa pedde, cussu est certu!"

"No est cosa e lear' a sa lizzera,
li rispondet, "deo l'isco da deris!
Ma si ti l'ischin sos carabineris
siguru chi ti ch'ettan in galera.

Faghe in s'ortu unu bellu bucu
chi siet altu unu metro e prusu,
interralu bene e posca susu
bi prantas duos rampos de sauccu".

Partit lestru e a cabu 'e un ora
torrat Giuanne, tottu sueradu,
nande: "Terra meda ad' avansadu
e timo chi la ien da 'e fora".

E su Sindigu: "Ma cantu ses duru
chi tottu ti deven ispiegare:
bae lestru, torra a iscavare
e interra cussa terra puru".

Passat un atter'ora e disperadu
torrat a bussare su mischinu
e narad' a su primmu cittadinu
chi atteru muntone b'hat restadu.

E issu rispondet: "Ahi, ite dannu!
Como ti lu narzo chi ses drottu:
si cheres chi sa terra b'istet tottu
deves fagher su toffu piùs mannu!"

Renzo Rosa 2002