Su sindigu de Iscanu e sos 'battos burdellosos
di Renzo Rosa

In sa cadena de su montiferru
b'iad unu paiseddu mentovadu
po cussu raru fruttu delicadu
chi pappain, de istiu e de ilgerru.

Sos abitantes de cussu paisu
coltivain sos ortos, operosos
po arregoller sos fruttos famosos
chi nomene han dadu a "Iscanu pisu"

Tottu sos ortulanos, de Iscanu
tenian pisu, dae s'annu a s'annu
e a guardianu, unu attu mannu
po tennere sos sorighes lontanu.

Ma s'ischit, su attu est burdellosu
cando atteru attu b'hat vicinu
miaulat, e su primmu cittadinu
a su notte, non acciappait riposu

e istufu de tantu miaulare
sa die a pustis una legge at fattu
ogni Iscanesu in possessu'e attu
s'ordine teniatde lu crastare!

sos abitantes, riunin in sa piazza
arrennegados po sa decisione,
chi los custringhet a s'operazione
de tottu sos battos de ogni razza.

E naran a su sindigu, chi mai!
No han'a zeder a cussu ricattu:
"Bois vivides in d'unu palattu,
ma nois, sena attu in domo, guài!

Su sindigu, a terra sa berritta,
iscudet, nervosu a mal'umore,
e narat: "sa legge est in vigore,
b'enzed'applicada ca est iscritta"!

Siet sentenzia! Sighit, accollinde,
sa berritta, pront'a sich'andare
ma cando andad'a sil'assettiare,
Ch'essin, duos sorighes, currinde!

2003