Su sognu 'e su Poeta
di Gianfranco Rosa

A su poet'ancora l'est permissu
Su chi negat s'issenzia a s'issenziadu:
De creer in d'unu fattu no provadu,
De sognare comente chered issu.
Sa fantasia superat s'abissu
De su connotu, de su limitadu
E bolat, cun sas alas de sa mente,
Subra sas siguresas de sa zente.

Sogno tempos chi sun immentrigados,
Isconnotos, velados de misteru.
A su chi cherzo dao cunsideru,
No sun contos chi cheren accertados.
Milli segretos los appo isvelados
E no m'importat s'est faula o s'est beru,
Ca nudda prus risultad arbitrariu.
Mer'est sa mente de s'immaginariu.

Tottu cuncordat: tempos, circustanzias,
Logos e personaggios, situaziones.
Cust'est su logu de sas perfeziones,
De sas unicas giustas arroganzias.
Prus ando aumentande sas distanzias
De sa realtade e de sas cunceziones,
Prus ponzo fattu a su sol'intellettu
E prus su sognu mi paret perfettu.

Cand'enit cudd'eventu, destinadu
Su corpus da sa mente a separare,
Senza prus sa materia a mi frenare
Pur'ideale ap'esser liberadu.
E sas cosas ch'aia immaginadu
In s'universu m'an accumpagnare:
Deo pensamentu, issas pensamentu,
In d'unu sognu senza finimentu.

(1990)