Su sole essit pro tottu
di Giovanna Maria Lai Dettori

In su carrettone de unu disizu
giogat s’isettu pitzinnu,
rascina rascina
in sas francas
de sas istajones
chi nudda an dadu e tottu lean.

Accudin a fiottu sos ammentos redossos,
abbados in sos sulcos de su tempus
allorigadu in sos zelembros istraccos,
affraigados in sa cara
de unu bisu mai fuidu.

In concheddas affumigadas de chelu
isteddos de chenadorzu
illattan promissas de luna.

Sun funguttas sas busciaccas de s’anima
pro coglire apilios de cras.

E cras….
cras su sole essit pro tottu.