Su valore de sos sardos in gherra
di Pittanu Moretti

1
Sardos si m’iscusades de s’azardu
Bos cherz’eo cumponner un’istoria
Subra s’ardire, su coraggiu sardu
Ch’in dogni gherra s’est bestidu è gloria,
Dae su tempus remotu pius tardu
Fin’a sa grande suprema vittoria,
Tales chi a memoria l’imparent
Sos benidores la canten e narent.
2.
Est difficile e ardua s’impresa
Chi m’hap’impolstu deo in penitenzia:
Cantare de sos sardos sa grandesa
E bigherla de tottu a connoschenzia;
Dae unu che a mie in sa bassesa
Poberu de iscola e de iscienzia.
Ma, lettores, passenzia tenide:
In su chi manco deo, bois supplide.
3.
E narrer chi Sardigna est mann’ istada
De poetas de geniu e de talentu
E chi sa poesia coltivada
L’hant sempre cun deliriu e cun portentu!
Sa rima sarda l’hant tottu ammirada
C’allegrat coro, mente e sentimentu,
Tant’hat poetas de abilidade
Sa Sardigna in dogn’epoca, ogn’edade.
4.
Anaòlia e Madau hant dedicadu
Sa musa insoro e sa divozione;
Cubeddu e Cupidu hat incensadu
S’isfogàda, amorosa passione;
Pisurzi s’ironia hat abbrazzadu,
Cantat felice s’abe si s’anzone;
E dogni passione e pompa vana
Custos descrient cun rima sovrana.
5.
Garippa, Lonis, Ibba descriesint
Semplices passiones amorosas;
Delitala e Pintus illustresint
De s’Isula sas bellas, sas ermosas;
Pinna, Buragna e Pintore cantesint
Baddes, pianos, fiores e rosas
Cun preziosas rimas e istile
Ch’hant su profumu suav’ ‘e abrile.
6.
E sambigucci cun sublime accentu
Toccat vivu su tastu sociale;
Carboni chi cun altu sentimentu
Cumbattit s’istrozzinu feudale;
Mannu cun fine intuitu e talentu
Descriet su furore baronale,
Cun liberale, arguta poesia
In tempos de feroce tirannia.
7.
E Pes cun amorosas cantilenas
Azzendet sas fogosas passiones;
Cherchi, Murenu, cun rimas pienas,
Argumentesint cosas e persones:
Privos de vista, ma mentes serenas,
Hant de prodigiu s’insoro cantones,
Chi cun impassiones masifestas
Tottu cantant in ballos e in festas.
8.
E Dere, su poema ch’hat iscrittu
De sa Gerusalemme Vittoriosa
Chi fra sos sardos tenet su meritu
D’haer lassadu un’opera famosa.
Professor Maninchedda, chi peritu
Fit de sa rima sarda preziosa,
Cun arte rigonosa e maestria
Modelliat sa sarda poesia.
9.
E Mossa, su canoru bonorvesu,
Astru brillante de su Logudoro,
Su versu sou brillante e azzesu
E a cantos toccadu ne hat su core?
De Bachis Canu, chie eo hat intesu
Su versu ismagliante e chie tesoro
Da Simula e de Tanchis no hat fattu,
De Mundula, Mameli e de Rubattu?
10.
Chie de Satta in limba italiana
— Mancar’hapat sa sua trascurad.a —
Su pastore, sa tanca, sa bardana
In pius lindu istile hapat cantadu?
De dottor Dore - cale sardiniana
Mura - arte perfetta hapat mustradu,
Sublime de cunzettu e de idea
In sa de “Eleonora d’Arborea”?
11.
Cocco, Migheli cun Farris e Chessa
In rima sarda hant tent’un’attritu
Contra su predi - pecora revessa -
Peppedu Cau hat fattu de peritu
Chi nd’hat dad’a s’infacch’e a s’imbessa
E medas veridades hat iscrittu
Cun ischisitu istile raffinadu
Hat su dogma pretescu ismascheradu.
12.
Dettori, Sanna e Dessanai ancora
Cun magnificos versos hant cunmpostu;
De Caddeo sa musa incantadora
Cantones populares milli hat postu.
De sa Sardigna, a tempus e a ora,
Breves zinnos a trattos nd’hat espostu:
A dogni costu est de s’Isula amante
E la difendet cun fide costante.

13.
Calvia mannu e Calvia minore
Sunt cignos de cust’Isula diletta;
De Secchi est ammiradu su valore:
De gloria bestidu si est goletta,
Sos isplendidos versos de Fiore
E de Peralta sa Musa perfetta;
De Nurchis s’elegante poesia
Dedita tottu a sa filantropia.
14.
E Fanari cun Poddighe e Caria
E milli e pius de milli atteros tantos
Antigos e modernos, ch’in poesia
Si trattenent in modas e in cantos
Ch’ispirant meda o pagu simpatia
E nde ottenent meritos e vantos.
In canots e poemas e muttetes
Tottu sun (u) t connottos pro poetes.
15.
E tottu, chie bene e chie male,
Hant cantadu su gentile sessu,
Chie pro puru istintu naturale,
Che pro simpatia o interessu.
Ma... de s’Isula traccia né signale,
Lassada in obliu e in regressu!
Tottu cantant d’amores, tradimentos,
Nessunu de sos prodes ardimentos!
16.
Un’Isula chi potentes legiones
hat dadu a sa romana Africa armada,
Ch’in tempos de agitadas passiones
Gherras annosas sustènnidu hada;
Ch’in sas politicas rivoluziones
Fidele italiana si est restàda:
Offerit e dat cun summ’allegria
Siguru asilu a sa monarchia.
17.
Un’Isula chi a sas primas battaglias
De s’unidade e de s’indipendezia,
Current a sas fortesas e muraglias
Sos menzus fizos de sa sarda renzia;
Affrontende sas barbaras canaglias,
Respinghinde sa brutta violenzia.
In presenzia de s ‘inimigu ardidu
Su sardu, mai, hat sa fama ismentidu.
18.
Un’Isula de razza infierida,
Zertu no mai in gherra inferiore;
Anzis inue si jogat sa vida
sempre mustrada s’est superiore
D’animu e de ispiritu ingrandidu,
Pront’a su sacrifiziu, a su dolore.
Pro tantu amore, eroismu e gloria
Podet narrer: da oe hat un’istoria.
19.
Ugualare, ma atteras Regiones
Podent mai Sardigna superare;
Ca fortes, animos che leones
Semper istesint pro terra e pro mare.
Gherras cruentas e invasiones
Podet nessunu popolu vantare;
De affrontare cun salda cussenzia
Chei su sardu pro s’indipendenzia.
20.
Finzas Carducci hat Sardigna vantadu
Ch’est de “pastores e d’eroes terra.
Girat subra su caddu sempr’armadu
In sa tanca, in su saltu e in sa serra;
Errante, tranquillu e animadu
Cantende muttos d’amore e de gherra.
Terra de coros saldos e potentes
Indice veru ‘e sos indipendentes.”
21.
Cando su Bullettinu Generale
Hat sa Brigada Sassari onoradu
Fit unu plebiscitu mondiale:
Dae tottu su sardu est ammiradu.
Ogni belligerante o neutrale
Su sardu hat juttu a fama in dogn’istadu.
E dae su passadu hamos a biere
Si nesesso s’istoria a desrivere.
22.
S’istoria de Sardigna est un’ìstoria
D’eroismos e de ribelliones,
De sacrifizios e d’aspiraziones
Chi l’innalzesint da gloria in gloria.
Su carattere s’indule notoria,
Sunt indice ‘e sas suas missiones;
Su genìu de s’istirpe gherriera
In issa apparit superba e fiera.
23.
Burbera, baldanzosa, linda e bella
Dae su fidu Tirrenu bagnada
Devet difender cun sa terr’amada
Sos litorales senza cautela.
E comente avanzada sentinella
S’incontrat giustamente incarrigada
De difender (sa) latina civiltade
Ei s’italiana libertarie.
24.
Attraversu de sos seculos tottu,
Dae sos tempos pius caliginosos
Chi de rapina e bottinu bramosos
Sos barbaros beniant a fiottu,
Finz’a sa gherra chi hamos connottu
In Libia cun sos turcos permalosos.
E in sas gherras de s’indipendenzia
Contra s ‘austriàca prepotenzia!

25.
E contra qualunque invasore
Sempre tenace su sardu est ‘istadu,
Comente su dottor Fenoglio hat nadu:
“Rom’est de su mundu dominadora
Pro virtude de vera gherradora,
Donu de sa natura decretadu.”
E Roma a dominare est destinada,
Ma però dae sos sardos azuada.
26.
Comente est nada Roma a dominare,
In s’universu a distender sas tendas;
De cust’Isola, cronacas, leggendas,
Monumentos, nuraghes tottu in pare,
Sas indules, su cantu populare,
Tottu, rammentant sas forzas tremendas:
De su sardu coraggiu e fieresa,
Prort’a si vindicare dogn’offesa.
27.
Sos omaggios chi faghert e onores
A Sant’Efis e a Santu Gavinu
Sardu ne b’hat chi no fettat s’irchinu
A custos duos santos gherradores:
De Sassari e Castedclu protettores
Indices veros de su sardu inclìnu.
Tottu faeddant in comunidade
in Sardigna de gherra e libertade.
28.
Su roman’ischit su sardu valore
Ca niimigu e amigu l’hat tentu,
De nobile e fieru sentimentu
Comente sas istorias dant sentore:
In accessu de odiu e de rancore
Sa gherra chi Amsicora hat sustentu.
Pro chi semper difesu si est su sardu
Cun s’arma, mai vile né codardu.
29.
S’Isula sarda grande contributu
A s’armada romana poi hat dadu:
In s’Africa su mundu hat liberadu
Dae s’egemonia chi fit ruttu,
S’infrantu no haiat e distruttu
Su pianu inimigu cumplettadu
Pro sos suos destinos fit fatale
Catastrofe e disastru mondiale...
30.
Su capu ‘e sos Pellitos sardignolos
S’attenet a pius vastos orizontes:
Cale sirbone in sos ispidos montes
E in selvaggias forestas, crabolos,
Sos caddos sardos curriant a bolos
In aspras hadde, rios senza pontes.
Amsicora, su chi hat sa cussenzia,
Est su chi cheret s’indipendenzia.
31.
“Salvade s’isula dae s’oppressore”
Gridat Amsicor’a sos isulanos;
Odiat fatalmente sos romanos
Che a dogn’atteru dominadore.
E lu seduit, lu tentat s’onore
De gherrare cun sas armas in manos
Cun su rornanu gherreri potente
Chi cheret ch’issu imperet solamente!
32.
L’est offerta sa bona occasione
Su chimbighentos trintasette s’annu,
M’ancora est sa repubblica in affannu
Pro sas feridas de Canne cun rejone!
S’Isula est in desolazione
Pro ch’hat pagos soldades, ite dannu!
E, causa de sos gravosos tribtutos,
Sunt sos malumores pius accutos.
33.
Gridat Amsicor’a sa libertade
Ei sos sardos libertade bràmant:
Entusiastos pro l’haer proclamant
Gherra a oltranza senza piedade.
Accurrent tottu, ‘e bona volontade
Si armant, gherrant e sambene versant;
Odiant sa romana prepotenzia
E gridat: libertade, indipendenzia!
34.
Cartagine, cun gioia e cuntentu
Appoggiat a sa sarda ribellione
E Asdrubale mandat in persone
Cun poderosa flotta is su momentu.
Ma... sas naves, ispintas contr’a bentu,
Tottu no benint in direzione.
Invece de sos lidos insulares
Approdant a sas isulas Baleares!
35.
Solu, Quinto Manlio Torquato
Est prim’ ‘e tott’a Cagliari arrivadu.
E subitu sos suos hat unìdu
Cun sa zente de Muzio in cuss’attu
E un bellu esercitu nd’hat fattu,
Seguru de su pianu istabilidu;
E pius de seguru, baldanzosu,
Chi si pariat già vittoriosu.

36.
Ancora Josto, d’Amsicora fizu,
Giovanu ardimentosu ma imprudente,
Forsis pro su ritardu impaziente
De su babbu trascurat su cunsizu!
Chissà, de si distingher in disizu,
Su babbu no isèttat, chi cun zente
Fit beninde su campu a rinforzare:
Offèrit battaglia e ‘ìntrat a gherrare.
37.
Josto, Iosto, no has isettadu
Sos alleados nè a babbu tou?
Da disubbìder su cunsizu sou
T’han iscunfittu e t’hant massacradu;
Has de virgine sambene bagnadu
Da terra, de s’azàrdu e de su prou!
L’has fatta e l’has pianta s’attrìvida
Ca l’has pagàda cun sa propria vida!
38.
Cun Iosto tremiza sunt restados
Mortos e presonèris ottighentos;
sos salvos e feridos cun lamentos
A Cornus si sunt tottu retirados!
Intantu, cun Amsicora arrivados
Sun sos cartaginesos bastimentos
Chi contr’a Menlio accanidamente
Isferrat un’attaccu onnipotente.
39.
Tr’ambos duos esercitos famosos
S’urtu est tremendu, sa lotta accanida,
Dogni colpu ‘e ispada est una vida
In ambas partes bi nd’hat valorosos.
Tottu disciplinados, coraggiosos,
Zent’allenada a s’arma e dezzidìda.
Est sa fortuna a sa zente romana,
Sardos e Cartaginesos perdid’hana.
40.
Asdrubale, gherreri’e grand’importu,
In mesu ‘e sos prodes s’est distintu.
Circundadu dae tantos, l’hant vintu
E presoneri l’hant arregortu!
Amsicora ischit chi su fizu est mortu,
E da dolore azzegàdu e cumbintu,
S’est ritiradu a piangher accùa
E si ‘occhit de notte a manu sua!
41.
Fint prodes Sardos sos chi ribellados
Cun Amsicora si sunt contr’a Roma:
Insofferentes de sa grave soma
A sa cale los haiat suggettados.
Ma... cando Rom’hat sos Sardos jamados
Contra Cartagine e resa l’hat doma:
Jutt’hant a Scipione cun orgogliu
Vittoriosu finz’in Campidogliu.
42.
Cando b’haiat calchi egemonia
Sa cale si deviat debellare,
Su indifferente a si restare
— Cussu si bi lu narant est bugia
Cun sos Romanos sempr’in cumpagnia
Fin sos Sardos sos primos a tuccare:
In dogni chistione mundiale
Su sardu tentu hat parte prinzipale.

43.
Cai sa ‘Cohers Sardorum’ est formada
Pro virtud’ ‘e s’istirpe sardiniana;
Una ‘e sas bìndighi coortes ch’hana
A sa cale in custodia affidada
Aggregadu a sa sigund’armada,
Istesit sa difesa cesariana
De sa Mauritania chi nesint
Chi sos sardos gelosos custodesint..
44.
Sos sardos acchistesint nobiltade
Cando, cun dun’isforzu sovrumanu,
Contra su barbaresimu africanu
Difesu hant sa latina civiltade.
Sighint sas lottas senza piedade
Sutta s’imperi ‘e Dioclezianu.
Iniziàda s’era cristiana
A mizas su martiriu tentu hana!
45.
Si tratta de un’Imperu trist’e brunu:
Rogos, cadenas e persecuziones!
Ecco ch’intantu sas invasiones
De su Medio Evo ennìdas sunu;
Sos Cotos benint a ìsquadrones
Avidos de predas e affamados
Sunt in Casteddu prima piombados...
46.
Sos sardos no si perdent de coraggiu
In vista de sa barbara insolenza
Opponent disperada resistenzia
Vindichende s’infamia, s’oltraggiu.
Da s’oriente intantu est in viaggiu
Narsète, a dar’a s’isul’assistenzia
Pro chi s’imperadore de s’oriente
Nos azzuesit cun flottas e zente.
47
Ospitone intantu intrat a mesu
Timìdu capu ‘e sos barbaricinos;
E... Gotos, Longobardos, Saracinos,
Cantos, mortos in terra nd'hat distesu?
Unu blocco feroce iss’hat sustesu
E pro annos e annos, intestinos
Urtos, attaccos, terribiles gherras
Che perduresint in sas sardas terras!
48.
Su re barbaru imbìat a Marcellu
Iniqu, ladru, assassinu e birbante
Cun Anseniu vile cumandante
De cuss’orda chi serninat flagellu!
Sos casteddajos nde faghent masellu;
No restat in zittade un’abitante,
Tottu s’avventant omìnes e femìnas
Contra de cussas ordas assassinas.
49.
Battoro frades, sigundu s’iscrittu,
Battor’eroes ch’hant prodigios fattu:
Ineriu, Nicolau e Torquatu
Cun Gialeto fint coros de granitu.
A Marcello e Arseniu hant trafittu
Sos esercitos sunt in disbarattu;
Su samben de sa zente chi ruiat
Intro ‘e Casteddu che riu curiiat...
50.
Sunt battor frades ma battor furores
Chi mai hepat inferru iscadenadu.
Mortos sos capos ecco isbaragliadu
S’esercitu ‘e sos viles invasores!
Cun allegrias, festas e onores
Sa libertade sarda hant proclamadu
E a unu ‘e sos frades, a Gialetu,
A re de sa Sardigna l’hant elettu.
51.
Est su seschentos norantatres s’annu,
Su primu re ch’in Sardign’hant votadu;
Saviamente Gialetu hat regnadu
Liberende sos sardos dae s’affannu.
Sigomente s’incarrigu fit mannu
S’isula in giudicados hat formadu;
Battor, divisos cun sublime idea:
Torres, Gallura, Cagliari, Arborea.
52.
Unu quartu ‘e seculu Ichnusa
Passesit senza esser molestada.
Ecolla dae sos Moros invasada
A su cumandu ‘e su potente Musa.
Sa gherra, dae prima circonfusa,
Tremenda e accanida est diventada;
Bidu sos Moros chi bincher est vanu
Rinunziant pro s’ora a su pianu.
53.
Torrant cun pius zente sos testardos
Abramidos in s’isula ‘e bottinu,
Ca sos aràbos a santu Austinu
Furare che lu cherent a sos sardos
Chi tenaces, fieros e gagliardos
De aràbos cobertu hant su terrinu!
E Cagliari restada est sa padrona
De s’àbidu ‘e su Piscamu de Ippona.

54.
Sighint intantu sos avvenimentos
A madurare sos sardos destinos:
E ispulsu che hant sos saracinos
Torres, Gallura e Cagliari cuntentos
Cun Arborea faghen (e) t festinos:
Cun mirabile accordu suddisfattos
Re cun Giudices, Piscamos, magnattos.

55.
Ma sa Sardigna est preda troppu ambìda
No la lassant in pagh’e unione.
De Moros una noa invasione
S’ottighentos e tres d’Ispagna ‘ennìda:
Ma Galiura cun Torres riunida
Tottu sas forzas bettant a cumone
E cun micidiale lotta rara
Sos Moros hant disfattu in s’Asinara!
56.
Sos Saracinos prosighint intantu
Ferocia a usare e prepotenzia;
E a forza ‘e fagher, sa passenzia
Perdet su sardu, su jogu est infrantu:
Sos Saracinos no hant agguantu
De fagher a sos sardos resistenzia.
Ma si difendent accanidamente
Implorende rinforzu prontamente...
57.
Cumponet Ilfredìco una cantone
Contra s’infame orda saracina:
Chi de Comita sa fiza Vetrina
“De sa Sardigna nostra campione
Contra sa barbaresca invasione
Est morta cumbattende ch’eroina!
E chie e cal’hat esser cudd’iscempiu
Chi de custa no sighit s’esempiu?”
58.
Custa cantone est s’ischinditta ‘e gherra
Ch’infiamadu hat sa sarda zente
Ca cumbattesint disperadamente
Pro liberare sa patria terra!
In casteddos, pianos, baddes, serra
Cumpattos gherrant accanidamente
E de sos saracinos invasores
Sos sardos faghent istrages, furores.
59.
Museto capu de sos musulmanos
Sa vida si riscattat a istentu;
E ammiradu su sardu ardimentu
Est dae Genovesos e Pisanos;
E in succursu de sos isulanos
Benint e bintrant in cumbattimentu:
Sos saracinos fuint disperados
E cun Pisa restamos alleados.
60.
In su milli e chibanta a vel’istesa
Sunt torradas sas ordas assassinas;
Cun saccheggios, incendios e ruinas
A Cornus attacchesint de surpresa;
Cun sa zente pisana e genovesa
Subrajuntos nde sunt sos Malaspinas:
Ei sos saracinos de paura
S’iscappesint de notte, a fuìdura!

61.
Isparidu su bruttu saracenu
Torrat s’isula in paghe e alleanza
E chircat s’unione e fratellanza
Infra sa zente isparta in su Tirrenu.
Ispassos e festinos senza frenu,
Faghent, su ballu tundu ei sa danza,
Ma tott’in duna sos divertimentos
Benint turbados da tristos eventos.
62.
Sas repubbllcas de Genova e Pisa
De comune accordu a s’Arborea,
Avidas d’haer sa Sardigna intrea
Ch’in battor Giudicados fit divisa,
Su regnu Turritanu de improvvisa
Attacant ma no binchent in s’idea:
Ca Gonarìu atterrat sos tirannos
Pustis de una gherra de degh’annos...
63.
Tra Arborea e Torres, una viva
Disamistade no podet durare!
Sunt valorosos populos, ch’istare
devent in armonia e cumitiva.
S’alleanza offensiva e difensiva
Hant conclusu cun Genova impare
Ma... sigundu s’istoria legenda,
Fit troppu maganzosa sa faccenda.
64.
E unu diabolicu minzidiu
Contra sos pisanos inventesìnt;
Fatale chi sos sardos custringhesint
De suscitare mortale dissidiu!
Ecco dae nou s’isula isparghesint.
Sos genovesos sunt ismascherados
Oh mo sun(u)t fideles alleados!
65.
In tottu su occultas tirannias
De su Medio Evo e palesadas,
I ntottu sas vicendas causadas
Dae feudalìsmu e barbarìas,
Dae Comunes e da Signorias
Mai fideles fint sos alleados...
Però resultat zertu e luminosu
Chi su sardu in gherra est coraggiosu.
66.
Pisa mandesit su conte Ugolinu
Pro nos annientare tottu in duna;
Cantu l’istesit sa morte importuna
Lu narat Dante in su cantu divinu!
E Genovesos e sardos continu
Cumbattesint cun varia fortuna:
Cando no b’hat vittoria assoluta
Che o eest a subra, crasa est sutta!
67.
Sassari intantu hat bidu e cumpresu
Ch’est s’ora d’esser libera arrivada;
In repubblica s’est dichiarada
E cun su podestade genovesu
unu trattadu istipuladu hada
E salda sa repubblica hat mantesu
Fin’a s’arriv ‘u e sos Aragonesos
Chi s’alliesint cun sos sassaresos.
68.
Mentres chi Marianu de Arborea
Da puros sentìmentos animadu
Pro semper sos pisanos ch’hat cazzadu
Illiberende sa Sardigna intrea,
Attera gherra mostruosa e fea
Contra sos d’Aragona hat impignadu,
Ca cun cinismu e storia maligna
Si cheriant padrones de Sardigna!
69.
S’aragonesu avidu e ingurdu
Movet cun dun’armada poderosa;
D’evitare s’istrage sambenosa
A sas supplicas sardas semper surdu.
E nd’est bennida in Aidu ‘e Turdu
cudda battaglia celebre e famosa,
Ch’istrepiotsa e tramenda vittoria
Fin’a oe descritta no hat s’istoria.
70.
Guglielmo intrepidu e testardu
Sollecitadu de (sa) sarda corona
Cun ass isceltas truppas de Aragona
Movet incontr’a su populu sardu;
Monico Cervellone cun Gerardu
Morint impare a tanta zente bona
E Guglielmo, perfida sa testa,
Morit de crepacoro in sa foresta!
71.
Ma cun pius frenetica degòria
Noa s’azzendet sa gherra intestina
Cun s’interventu de sos Malaspina
Tra sos aragonesos ei sos Doria.
Persighint indezzisa sa vittoria
Tr’ambas partes cun dannu e cun ruina!!
Tantu eh is azittade sassaresa
Assediada est sì, ma no arresa...
72.
Sa gigantesca lotta hat ingaggiadu
Marianu quartu de Arborea
Cun su re d’Aragona — anima fea —
Chi gherrende vint’annos est duradu!
E Brancaleone Doria eh’ ‘istadu
Generu l’est, isposende sa dea
Sarda, grande gherrera Eleonora
Chi nd’hap’a faeddare in atter’ora.

73.
Sas soldarias da su re Martinu
Infamias a Seddori hant cummittìdu
E a ispada nuda hant bocchidu
Tanta zente, chi subra su terrinu
Ei curriat su samben’a trainu
Che simmai in jerru abbas s’hat bidu!
Ma l’est costada cara in veridade
Sa vittoria sua e crudeltade !
74.
Una giovane ermosa e attraente,
Sa bella de Seddorì intitulada,
Sos patriotas vindicadu bada
Cun sa bellesa sua seducente...
Su re si nd’innamorat pazzamente
E cando cret de l’haer conchistada
Lu pugnalat a intro de su lettu
E l’ispaccat su coro in nett’in nettu.
75.
Assigurada totta triunfante
Chi no fiàdat pius su mal’accortu
Gridat: “O Seddoresos, aiòrtu,
Mustrende su pugnale sambinante
De sa nostra vinditta ecco s’istante
Coraggiu sardos, su tirannu est mortu!
Si sullevat su populu accanidu
S’esercitu ‘e Martinu hat destruidu!
76.
Tres annos pustis custu avvenimentu
Ch’hat isturdìdu s’Europa intrea,
Torra contra sa zente istranzera
Un’atteru episodiu hamos tentu.
Visconti de Narbona a tradinrientu
Fenetresit a intro ‘e s’Alighera:
Ma de sos suos alabardìeris
Parte nd’hat mortu e parte presoneris.
77.
Pedru Ferrera, sardu campione,
Gerolamu Ferret, bona memoria,
Chi coronados si sunt de gloria
Pro forza ardire e coraggiu ‘e leone:
Pedru in s’assediu de Monteleone
Bene difesu dae Nicolò Doria;
Gerolamu in s’esercitu ispagnolu
Hat dadu grande fama ‘e sardignolu.
78.
E Leonardu Tola, ozieresu,
S’erculeu Moro in Granada hat bintu;
Cantos mortos e resu nd’hat custrintu
Puru Franziscu Saba, sassaresu;
Leonardu Alagon, oristanesu,
Però pius de tottu s’est distintu:
De Monreale, Seddori e Uras
Sunt immortales sas suas bravuras.
79.
Custu potente duce oristanesu
Cant’hat gherradu nos i podet crere;
In sa grande battaglia ‘e Macumere
Coment’unu leone s’est difesu:
Subraffattu de zente, no s’est resu,
A Bosa fuit cun dispiaghere,
Tentat in duna nave de iscappare,
Ma... tradimentu! Lu’occhint in mare.
80.
Sempre rifulgit su valore sardu,
Terror’est cand’in gherr’intrat a mesu.
Chentuchimbanta piratas hat presu
Cun degh’omines soiu, Don Bernardu.
Ciagu Manca Tiesi, a Castelsardu
Difendet dae s’esercitu franzesu
Capitanàdu dae Renzo Ursinu:
No zedit unu palmu de terrinu.
81.
Goffredo Cervellon, cagliaritanu
E Pedru Aymerich —- anima cara —
Cun chentu omines solu — prova rara —
Capitanados dae Cìcciu Canu
A corpu corpu cun s’ispada in manu
Battorchentos nd’hat mortu in s’Asinara!
Diegu D’Arragàl, Giuanne Càriga,
Tottu sardos de coro e de buttariga.
82.
Sunt tottu sardos ch’hant paradu fronte
Ch’hant fattu prodesas sende ‘ios
E pro difender sos logos nadios
Curriant a sos lidos e a su monte.
Mir’ìn su litorale ‘e Portu Conte
Su Marchesi Amat ‘e Villarios
Cun tres omines sa lotta hat sustesu
Né lassat isparare unu franzesu!
83.
Cando sos Moros a traittoria
In Alabe e Badd’Ena hant isbarcadu
E hant a Magumadas circundadu
Cun tanta mostruosa barbarìa,
Pro jugher ischiavos in Turchia
Sos abitantes a trubu hant leadu,
A forza, impadronendesi ladrones
De ‘inaris e prendas e persones!
84.
Curret da ‘idda Giuanne Maria
Poddighe e gioventude paisana
E los attoppant in canal’ ‘e Giana.
Los attaccat cun tanta ferocìa
Manc’una pedde b’hat restadu ‘ia
De cuss’ischiva razza musulmana!
Lis leat sa vida, barcas e bandera
E liberadu hat sa’idda intera.
85.
Una grande flottiglia franzesa
Occupesit sa turre de Oristanu;
Pedru Fortesa, su cagliaritanu,
Attaccat s’inimigu de surpresa;
Chimbanta inimigos — it’impresa —
Mort’hat da solu unu Dominicanu:
Fuit sa Franza lassende cannones,
Otto vessillos e muniziones!
86.
Ma no est solu in s’isula benigna
Chi gherrende su sardu s’est distintu:
Cando gherradu hat Carlo Quintu
Medas l’hant postu fattu dae Sardigna
E gherrende cun s’Africa maligna
Sos musulmanos hant iscuttu e bintu.
E lodende su sardu coraggiosu
Torrat Carlo Quintu vittoriosu.
87.
Ma sunt puru sardos campiones
Micheli Ruitz, Nanni Galluresu,
Dominigu Loi, Anghelu Tiesu,
Zuseppe Pullo e Diegu Masones,
Antoni Pinna cun frades Melones,
Gerolamu Pitzolu, Ezui Esu;
Franziscanzelu Mura e Peppe Sanna
Custos tott’hant godidu fama manna.
88.
In su milli e seschentos trintasette
Giagu Artaldu a Fiandra partidu
Cun su plotone sardu riunidu
E cun su capu Luisi Melette
A isparos e colpos de iscupette
Trint’i’nimigos da solu hat bocchidu:
Dagh’hat finidu sa munizione
S’iscupette manizat pro bastone.
89.
Zuseppe Delitala puru ‘e Bosa
Hat cun onore in Ispagna gherradu
E l’hant in Barcellona medagliadu
Pro s’azione sua ardimentosa.
A sa gherra de Napoli famosa
Cun Carlu Terzu s’est arruoladu
Pro su grande coraggiu e samben blandu (?)
L’hant affidad’unu grande cumandu.
90.
Su mill’e chimbeghentos settantunu,
In sa gherra de Lepanto famosa,
Sa soldatesca sarda gloriosa
Est sa pius famada dae dognunu.
Tottu sos sardos distintos si sunu
Contra sos Turcos — sa razza odiosa —
Conquistende cun s’ispada in manos
Tottu sas terras des sos cristianos.

91.
E in sa flotta chi hat cumandadu
Giuanne de Aùstria fìeru,
De su fiore sardu gherrieru
Chimbeghentos si nd’hat arruoladu
E a sos turcos lis hant leadu
Chimbe trofeos de s’insoro impreu!
Unu ‘e sos cales cun devozione
Jughent in Cagliar’in processione.
92.
S ‘ammiragliu Laèche hat isbarcadu
A Cagliari pomposu cun sa flotta
E de leare sa Sardigna totta
S’imperiosu ordine l’hant dadu.
Ma s’isula hat s’Imperiu odiadu
No si rassignat a l’esser divota
E cuminzat a fagher oju ‘e triglia
A s’inattesa, abburrida famiglia...
93.
Male supportat Sardigna s’oltraggiu:
Nde dat sos primos sintomos Gallura.
Fremitos e protestas e congiura
Formant contra s’ospite malvagiu;
E dae s’Ispagna, Alberoni, in viaggiu
Ispedit a Sardigna cun premura
Una potente flotta agguerrida
A su cumandu ‘e Marchesi Leyda.
94.
Appena custa flotta est arrivada
Luego hant a Casteddu assediadu
E deghesette dies hant gherradu
Senza sussegu, a sa vid’airada!
S’austriaca truppa est inscappada
Daghi s’est bida a puntu disperadu
E Cagliari s’est resa cun piaghere
De su Marchesi Leyda in podere.
95.
S’ammiragliu Laèche, angustiadu,
Tentat inatter’ue fagher proa
E pro disgrazia sua in Terranoa
Intr’ ‘e notte e s’acqua hat isbarcadu.
Ma... appena iscobertu, circundadu
Sos Galluresos l’hant e fatt’in coa!
Ca los hant disarmados tottucantos
E bastonados e fattos a... cantos!
96.
E los hant senz’armas rispedidos
Da inue fint bènnidos cun fregiu
Tusos e maleconzos pro ispregiu
Confusos ,birgonzosos, avvilidos,
S’hant a esser de sa ‘ennida pentidos.
E bene lis hat fattu su curreggiu
Can non che sunt a Sardigna torrados
Cun d’una ‘olta nde sunt ischeddados.
97.
Cun sa paghe d’Utrècht finit sa noia
E si cessat sa gherra sola sola;
Si ritiresit sa truppa ispagnola;
A su trattadu de Londra cun gioa
Passàda est a sa domo Savoia
Sa nostr’isula bella sardignola:
E a sa dinastia dae s’ora
Asilu e baluardu forte ancora.