Istigas birdes sigo,
sinnadas dae sos antigos mios
errantes in sa terra,
chirchende terras bonas e isteddos,
e sonos de amore
pro caentare su cor’ in su nie.

Viagios in bijones,
ìn sèmidas de durches raighinas,
renchènnida m’ispinghet,
ma cand’acudo non b’est mancu s’umbra
de su chi bramaia,
su riu de sa vida l’at trazadu.

Divess’ est cussa ‘idda,
divessas sunt sas abbas, sas carreras,
ca solu chie non ch’est
su pàrrere non mudat in sas losas,
a nois restant bisos
e sos disizos chi nos asseliant.

E tando mi l’abbratzo
su sònniu de cust’andalitorra,
mi giughet a su logu
inue chel’ e terra si aunint
pro ‘intrar’in su mare
de un’infinidade chena tempus.