T'apu circau

T'apu circau
me is fueddàdas mudas
de is nottis steddadas,
candi is isteddus arràianta scéti
fueddus impipìus de misteru.

T'apu circau
in su silentziu 'e su mari
candu s'unda scinitzosa
s'assèliada
e tremi tremi si citiri
intr''e is bratzus de un'arena de prata.

T'apu circau
in sa paxi de is montis niàus
me is arrocas
imbrachinàdas de nì
chi tèninti bisùra de biadèsa.

T'apu circau
aintru 'e dogna cresia
in su profumu 'e is froris
in su fragu 'e sa timòngia,
in su fumu e in sa frama de is candelas
me is bistìris nieddus,
me is cantus de ariseru, de sempri...

Ma Tui, aùndi fiasta ?

Dogna dì T'apu circau...
Ti circamu atesu...ma
iat'essi' bastau a mi castiai a costau,
poita Tui...Tui ses innòi cun mei
e sempri m'as acumpangiau.
A pustis sa tribulìa
est bellu...tropu bellu sciri
ca Tui mi camminas a costau.

Ignazio Mudu - Assemini (CA)
imudu@unica.it