New slot
(tràppula a pagamentu)

T’an fatu ladra! Ma che Dea attraes
chin sos colores allegros chi tenes.
A s’and’e torra sas lughes mantenes
pro t’attirare sos malefadados,
e cando son de tene innamorados
che lis furas de s’ànima sas craes.

Lis furas tottu! Tempus e fadigas,
chin s’arma tua ‘e sas illusiones,
e sèmper’ in delìriu los pones
cando lis torras azigu ‘e s’issoro.
Pòveros issos! Prus t’an in su coro
e prus donzi valore che li pigas.

Oras e oras, donzi die affogan,
in sos disizos chi mai s’avveran,
e insistin! ... insistin! ... Non si seran
de cant’istan ruende in povertade
cando fintzas s’issoro dinnidade
impare a donzi bene si la jogan.

Non los ingurpo! Che drogados ruen,
in cust’imbentu de disonestade,
ca dèbbile est s’issoro intimidade
e sa fortza ‘e ch’essire non l’agattan.
A dolu issoro, tottu si barattan,
si cando son in tempus non si fuen.

Lassende custas tràppulas paradas,
s’Istadu est lende a s’onore sa vida,
ca sa zente ch’est dèbbile e famida
l’est faghende “jogare” chin su “fogu”.
At aju ‘e narrer ch’est solu unu jogu
pro sas pessones ... pagu fortunadas!

Secondo Premio - Concorso di Poesia “QUARTUCCIU 2015”